Kane ka sorkar ka pyni da ki kam, ong u President ka HSPDP ba wanrah Resolution pyrshah Uranium

Shillong,Nailar 27 :  U President ka HSPDP, Bah KP Pangniang, u la pynpaw ïa ka jingsngewkmen bad ka jingsngewnguh ïa ka Sorkar Jylla hapoh ka jingïalam u Myntri Rangbah Conrad K. Sangma bad ka Kynhun Myntri, halor ka jingwanrah ïa ka Official Resolution pyrshah ïa ka jingtih Uranium hapoh ka jylla.
Haba kren bad ki lad pathai khubor, u Bah KP Pangniang u la ong ba kane ka rai ka long kaba kongsan bha namar ka mat ban pyrshahtih Uranium ka long kawei na ki mat ba ka party HSPDP ka la ïakhun bad ka la buh kum ka mat elekshon la palat 35 snem.
“Ngi sngewkmen bad sngewnguh ïa ka Sorkar Jylla hapoh ka jingïalam u Conrad K. Sangma bad ka Kynhun Myntri halor ka jingwanrah ïa ka official resolution pyrshah ïa ka jingtih Uranium hapoh ka jylla,” u la ong.
Shuh shuh u la ong ba ka jingmynjur lang jong baroh ki seng saiñ pyrthei halor kane ka resolution ka pyni ba ka Sorkar ka sngap ïa ka sur jong ki paidbah bad ïa ki seng saiñ pyrthei.
U Bah KP Pangniang u la pynkynmaw ruh ba ha u snem 2016, ka party ka la don bynta lang ha ka rai jong ka Kynhun Myntri ha ka por jong u Dr. Mukul Sangma ban pynsangeh ïa ki kam tih Uranium hapoh Domiasiat –Mawthabah bad ha kiwei kiwei ki jaka. Hynrei, u la ong ba ka Sorkar mynta ka la shim sa kawei ka sienjam da kaba wanrah ïa ka Resolution ban pyrshah bad khang syndon ïa ka jingtih Uranium hapoh ka jylla.
U la ong ba kane ka rai ka pyni ruh ïa ka nongrim ba skhem jong ka HSPDP halor kane ka mat, kaba ka party ka la bat la bun phew snem, watla don ki briew kiba ju kynthoh ïa ka party ba ka shu “snoh” ne ‘sdien’ bos.
U President ka HSPDP u la kynmaw ïa ka nongrim jong u President Rangbah barim ka party, (L) Bah Hoping Stone Lyngdoh, uba, katkum ka jingong jong u, u la ju pynpaw ba ka party kam dei ban ïapein ne klet  ïa ki mat treikam jong ka party, kampher la ki don ha ka Liang Synshar ne ha ka Liang Pyrshah.
“Kum ka party kaba don bynta lang ha kane ka Resolution, ngi sngewnguh ïa ka Sorkar bad ïa baroh kiba la don bynta lang ban shim ïa kane ka rai kaba radbah,” u la ong.
Haba jubab ïa ki jingkynthoh ba ka HSPDP ka shu kren khlem da leh eiei, u Pangniang u la ong, “Lada phi peit ïa ki rekod jong ka Ïingdorbar Thawaiñ, phin sa lah ban ïohi shai ïa ki nongrim jong ka party bad ïa ka thong treikam jong ka.”
Shuh shuh u la pynpaw ruh ïa ka jingkmen ba ki nongmihkhmat jong ka party ba haman ba don ki Resolution la ka long naduh ka ILP ne jingdawa Ktien Khasi bad Ktien Garo ha ka Khyrnit kaba Phra, ki don lang ïa ka bynta kaba khraw.
U la ong ruh ba ka HSPDP kan dang bteng ban dawa bad ïakhun halor ki mat kiba ka party ka ngeit kumba ka la buh ha ki mat ïakhun elekshon, watla katto katne na ki jingdawa kim pat ïoh ïa ka jubab kaba biang.
U la ong ba kawei na ki mat ba ka party ka dang ïai dawa ka long ban pynbeit thymmai ïa ka Khynrit kaba Hynriew haba ïadei bad ka Para 12 A(b).”Ha kane ka 125 Amendment Bill kaba dang don ha Parliament kane ruh ka dei ka ishu kaba nga lah ban pynpaw hangne ba don kiei kiei kiba ngim lah ban pdiang hangi kum ka Jaidbynriew,” u la ong.
Da kaba kdew ba ka sorkar pdeng ka don ïa ka Mines and Minerals (Development and Regulation) Act (MMDR Act), u Bah Pangniang u la ong ba ka sorkar India ka donbor ha ka khyndew ka shyiap. Hynrei u ong pat ba ha ka jylla Meghalaya kumba la tip baroh bad ba Supreme Court ka la ai ïa ka hukum ka pynksan ba ka khyndew ka shyiap ka dei kaba long trai da ki trai jaka bad ba ki mar hapoh jong ka ruh.
U la ong ba ka HSPDP ka la dep ban phah kumba lai tylli ki dorkhas sha ka sorkar ha ki snem ba la dep, bad mynta ki kyrpad ban wanrah sa kawei ka official resolution halor kane ka mat, khnang ba ka Forest Act bad ka MMDR Act kan ym ktah ne treikam ha Meghalaya.
U Bah Pangniang u la pynpaw ba ka HSPDP kan dang ïai bteng ban ïakhun halor kane ka mat haduh ban da ïoh ïa ka jingpynbeit kaba biang na ka bynta ka jylla bad ki paidbah jong ka.