Shillong, Nailar 19 : Ki dkhot ka Khasi Students’ Union (KSU) kila pynlong ïa ka jingïakhih ba shipor ha Main Secretariat ha ka sngi Balang da kaba wah ïa ki banner ban pynpaw ïa ka jingpyrshah halor ka jingbym leh eiei ka Sorkar ïa ki 5 tylli ki mat dawa ka seng.
Ki Pulit kila weng ïa kine ki banner tang da ki minit bad ki la pynkhlaiñ ruh ïa ki bor pahara ha sawdong ka Secretariat. Kane ka jingïakhih kala wan jia tang da ki kynta shuwa ka rally thuk thuk ban rah lama iong jong ka KSU na Jaiaw.
Ki banner kila kynnoh ïa ka Sorkar ba jied briew lajong bad bam sap ha ka thungkam thungjam bad dawa ïa ka jingthungkam kaba khuid bad ba shai.
“Ngi la pule shitom, ngi la pass hynrei haba kut ka sngi, ïa ki kam la ai tang sha kito kiba lah ban thong pisa” ong kawei ka banner.
Ha ka 17 bad 18 tarik Nailar, ka KSU kala pynlong ia ki jingïalang paidbah ha kylleng ka sor Shillong hadien ka jingaipor ba 15 sngi ïa ka Sorkar.
U General Secretary ka KSU u samla Reuben Najiar ula ong ba ki jingdawa ba hakhmat eh ki kynthup ïa ka jingkheiñ iap ïa ka public hearing ka Shree Cement ba long ha ka 31 tarik Naitung 2026 ha East Jaintia Hills, ïa kaba ka seng ka kynnoh ba ka dei ka kam kaba la don ka jingïapynbeit lypa.
Ka KSU kala dawa ban leh eiei pyrshah ïa u DC, SP, ki Heh Pulit bad ki Heh ka MSPCB, bad ban pynshitom ruh pyrshah ïa kito kiba kynnoh khang ïa ki paidbah ban leit sha ka hearing.
