Rai ban phah treikam ïa ka MLCU tang ha jylla la pynduh ïa ki jingpule ba sha jngai

Shillong, Nailar 19 : Ka Kynhun Myntri ka Sorkar ha ka sngi Balang ka la ai jingmynjur ïa hynriew tylli ki Bill ba ïadei bad ka tnad Pule Puthi, ba kynthup ïa lai tylli ki amendment, artylli ki jingtyrwa ïa ki University shimet ba thymmai bad kawei ka jingpynduh noh ïa ka University (repeal).
Haba kren sha ki nongthoh khubor hadien ka jingïalang bala pynïaid da u Myntri Rangbah Conrad K Sangma, u nongaiktien ka Sorkar MDA bad Myntri Sorkar Bah Wailadmiki Shylla ula ïathuh ba baroh ki mat bala wanrah hapoh ka Kynhun Myntri ki dei na ka Tnad Pule Puthi.
“Mynta ka sngi ngi la ïakren ïa hynriew tylli ki mat bad baroh kine ki mat ki wan na ka Tnad Pule Puthi. Kiba bun ki dei ki Bill- lai tylli ki amendment, artylli ki bill thymmai ban sa wanrah hapoh ka ïing Dorbar bad kawei ka dei ka bill ban pynduh noh (repeal)” ong u Bah Wailad.
U ïathuh ba ka Kynhun Myntri ka la mynjur ïa ka Maharashtra Institute of Technology, Meghalaya (Amendment) Bill, 2026 ban wanrah a ka kat kum ki kyndon ka UGC.
Kat kum ka jingong jong u, ka original act ka shah ïa ka sponsoring body ban rai ïa u Visitor, hynrei ka amendment ka buh ba u Lat ka Jylla u dei ban long u Visitor, kumba long kiwei ki University hapoh ka Jylla.
Ka Bill ka tyrwa ruh ban pynbun ïa ka jingdon nongmihkhmat na ka Sorkar ha ka Board of Management na uwei sha ki arngut bad ha ka Board of Governors na uwei sha ka lai ngut.
Kum kane ka amendment la mynjur ruh na ka bynta ka Mahatma Gandhi University (Amendment) Bill, 2026.
U Bah Wailad u ïathuh ba baroh kine ki jaka pule ki la bud mynshuwa ïa ka kyndon ha ka ba ïa u Visitor la rai da ka sponsoring body, bad ka amendment kala pynbeit ïa kane haba pynbun ruh ïa ki nongmihkhmat na ka Sorkar ha ki governing body.
Ka Kynhun Myntri kala mynjur ruh ïa ka Martin Luther Christian University (Amendment) Bill, 2026.U Bah Wailad u ïathuh ba ka amendment ka khang ïa ka University ban treikam tang hapoh ka Jylla Meghalaya, haba weng noh ïa ka kyndon ban leh ïa ka distance education ka bym shah satia ïa ki university shimet.
Ka amendment kala pynduh noh ruh ïa ka bor ban pynïasoh ïa ki college, ka bym shym la shah satia hapoh ki kyndon ka UGC. Ka Kynhun Myntri kala ai jingmynjur ruh ïa artylli ki Bill jong ki University ba thymmai.
Ka Sister Nivedita University, Meghalaya Bill, 2026 ka tyrwa ban buh ïa ka university ha Byrnihat katba ka Khasi Jaintia Presbyterian University, Meghalaya Bill, 2026 ka tyrwa ban buh ïa ka university ha Sohiong. Ka mat ba mynjur khatduh ka dei ka International Open University (Repeal) Bill.
U Bah Wailad u ïathuh ba ïa ka Act la mynjur da ka ïing Dorbar Thaw Aiñ ha u snem 2011 hynrei kala shu sahkut khlem treikam tad haduh u snem 2022.
“Ha u 2022, kila don ki briew kiba wan shakhmat ryngkat bad ka power of attorney, hynrei hadien ngi la ïoh jingtip ba ka don ka jingïakajia” ula ong. Kumta u ong ba ka Kynhun Myntri kala rai ban pynduh noh ïa ka Act naba ka kyrteng kala pynkheiñ ïa ka kyndon UGC.
“Lada phi peit ïa ka kyrteng, ka dei “International Open Univerity’. Ka kyntien ‘International’ ka don, bad “Open University’ ruh ka don lang, ka bym shym la shah kat kum ki kyndon ka UGC. Kumta, ka Kynhun Myntri ka sngew ba kan bha shibun ban kiar ïa kano kano ka jingeh ki ban mih hadien habud. Ta ka daw ngi la pynduh pyndam noh ïa ka Act”.
ïa baroh kine ki hynriew tylli ki Bill yn sa wanrah ha ka Dorbar Synrai ban wan jong ka ïing Dorbar Thaw Aiñ ka Jylla.