Wan sha ka miej jingïakren ka Sorkar ka kloi ban ïakynduh bad ïakren bad ki nongïalam KSU

Shillong, Nailar 19: U Myntri Sorkar bad nongaiktien ka Sorkar MDA Bah Wailadmiki Shylla u la kyrpad ïa ka Khasi Students’ Union (KSU) ban wan sha ka meij ïakren da kaba pynskhem ba ka Sorkar ka long kaba la pynkhreh ban sngap bad pynbeit ïa ki jingeh bad ki jingdawa lyngba ka jingïakren.
Haba kren sha ki lad pathai khubor halor ka jingïakhih jong ka KSU, u Bah Wailad u la ong ba ka Sorkar Jylla ka plie ïa ki lad ban ïakren halor baroh ki mat ba ka seng ka la pynpaw.
“Hooid, thikna ngi la pynkhreh ban ïakren. Nga kwah ban pynpaw ba ka Sorkar ka plie ïa ki lad ban ïakren. Ngi la pynkhreh ban sngap” ula ong.
“Nga tharai ba ka jingïakren ka dei ka lad bad ka lynti ban ïaid shakhmat. Kumta nga kyrpad bad kyntu ïa ka KSU ba kan wan ban ïa kren bad ka Sorkar,” ula bynrap.
Ka KSU ka la pynpaw 5 tylli ki mat sha ka Sorkar da kaba dawa ban pyntreikam mardor.
Ka jingdawa ba kongsan ka ïadei bad ka Public Hearing kaba la long haka 31 tarik Naitung 2026 na ka bynta ka Shree Cement ha East Jaiñtia Hills, kaba ka seng ka la kynnoh ba ïa ka Public Hearing la leh daka bor namar khlem shah ïa ki ba pyrshah ban wan ïashimbynta.
Ha kaba ïadei bad kane, ka KSU ka la dawa ban shim da ki sienjam ba tyngeh pyrshah ïa u Deputy Commissioner, Superintendent of Police, ki heh pulit bad ki ophisar jong ka Meghalaya State Pollution Control Board, ha ryngkat ka jingpynshitom ïa kito kiba shah kynnoh ba ki khanglad ïa ki ba pyrshah ban leit ïashimbynta.
Ka seng ka la dawa ruh ban pyntreikam pura ïa ka Meghalaya Residents Safety and Security Act, 2016 tad haduh ban da buh ban da ïoh pyntreikam ïa ka Inner Line Permit system.
Ka ka dawa ban buh ïa ki khyrdop (facilitation centre) ha baroh ki 18 tylli ki entry point ha Khasi bad Jaintia Hills bad ïa ka jingpynshisha jong ka jingwan rung ki bar Jylla dei ban leh tang da ki Dorbar Shnong.
Kiwei pat ki jingdawa ki kynthup ban pyntreikam noh mardor ïa ka aiñ Migrant Workmen Act, 2020, ki jingpynkylla ha ka thungkam ha NEIGRIHMS kata daka ba pyntreikam 80:20 kynthei bad shynrang haba thung kam Nurse, ka jingbhah kyrpang ïa ki Khasi, Jaiñtia bad Garos, bad ban weng noh ïa ki Interview na ka bynta ki kam haka thup B, C and D nalor ka jingwanrah daka Standard Operating Procedures ha baroh ki Board thungkam.