Shillong, Nailar 19: Ka Nangkiew Irat bad ka Nongkseh ki la ïasam mar shi point hadien ba ïakhaid mar 1-1 kol hynne ka sngi Balang ha ka lympung Shillong Premier League 2026, kaba la long ha madan First Ground-SSA Stadium.
Baroh ar liang ki la don bynta ha ka jingïakhun kaba kut da 1-0 kol ha ka wat ba nyngkong – Ka Nongkseh ka la pynliem ïa ka Mylliem da katei ka jingkheiñ ha ka 27 tarik Naitung katba ka Nangkiew Irat pat ka la shah rem ha ka Shillong Lajong ha ka 29 tarik Naitung.
Ka Nangkiew Irat ka la wanrah tang ar tylli ki jingkylla ha ka kynhun ba sdang – ha kaba u Yhoto Lohe bad u Wallamsuk Nongkhlaw ki la sdang ha ka jaka jong u Sangti Janai Shianglong bad u Shrikant Gadaba. Ha kawei ka liang ka Nongkseh, ka la pynkylla hynñiew ngut da kaba pynshong ben ïa katto katne ki rangïalehkai ba kongsan hadien ka jingdon bynta jong ki ha ka Durand Cup. Kiba la sdang ki long u Kynsailang Khongsit, Aenam G Jyrwa, Dawanchwa C Challam, Banraplang Pyngrope, Kitboklang Pale, Daraphun Talang bad u Mebankhraw Wahlang bad kiba la shah pynshong jahthait ki long u Banskhemlang Mawlong, Banpynkhrawnam Nongkhlaw, Sheen S Sohktung, Hardy Cliff Nongbri, Arlangky Nongsiej, Kynsaibor Lhuid bad u Guidle Syiemlieh.
Ka Nangkiew Irat ka la ïoh ïa ka jingsdang kaba paka hadien ba u Wallamsuk Nongkhlaw ula ïohlad ban pashat ïa ka bol lyngba ki rangapdien ka Nongkseh na ka bynta u Jefferson ba un thep ïa ka kol kaba nyngkong jong kane ka jingïalehkai.
Ka Nongkseh ka la ïoh shibun ki corner kick katba ka dang pynkhlaiñ ban ñion shakhmat ha ka jingpyrshang jong ka ban pynïakhaid, watla ym baroh kidei kiba ka la ïoh na kaba pyrshang sha kol, hynrei namar ka jingpynslem u nongap kol ka Nangkiew Irat, u Surjay Kumar Pariyar, kaba u referee u Guarishful Marwein, u la pynshitom da kaba ai korner ïa ka Nongkseh. Hynrei ym don kawei ruh na kine ki corner kick kiba la kylla long ka jingmyntoi na ka bynta ka Nongkseh.
Ka kol pynïakhaid ka la urlong na ka bol pashat kaba thikna jong u Kynsailang kaba ki rangïalehkai ka Nangkiew kim shym la lah ban khanglad, bad u Kitboklang u la shim ïa kane ka kabu ban pynkhihjar.
Ka Nongkseh ka la synshar la jan baroh ka jingïalehkai ha ka kylla miet bad ka jingïakhun ka la nang jur katba nang ïaid ki minit, bad ka Nangkiew Irat ka la pyrshang katba lah ban pynskhem shadien khnang ban ïoh la kumno kumno shi poiñ, katba ka Nongkseh pat kam kwah eiei ban ïa ka jingjop.
Watla ki la don katto katne ki kabu thep kol hynrei baroh arliang kim shym la lah satia ba kin pynkhihjar haduh kaba kut jong ka por, kaba pynlong ïa baroh ar liang ban ïasam mar shi point.
Da kaba ïakhaid, ka Nongkseh ka shong mynta ha ka kyrdan ba ar ha ka miej da 4 point katba ka Nangkiew Irat ka la ïoh ban kamai ïa ka shi point ba nyngkong.
Ka jingïalehkai ban wan kan long lashat ka sngi Thohdieng hapdeng ka Mawlai bad ka Shillong Lajong ha ka por 6 baje janmiet. Baroh arliang ki la jop ïa ki jingïalehkai ba sdang, ha kaba ka Mawlai ka la pynjemkhnap da 5-0 ïa ka Laitkor ha ka 30 tarik Naitung, katba ka Lajong ka la jop da 1-0 ïa ka Nangkiew Irat.
