Ka Pine Home kan dei ka karkhana kaba im bad ka Twahlongwar kan dei ka kamra klass kaba im: CM

Mawkyrwat, Nailar 17: Ban kyntiew ïa ka kam jngohkai pyrthei ha ka South West Khasi Hills District mynta ka sngi ka 17 tarik u Nailar, 2026 u Conrad Sangma uba dei u Myntri Rangbah ka Jylla ha ryngkat ka jingïadonlang u bah Prestone Tynsong uba dei u Symbud Myntri Rangbah ka jylla lem bad u Timothy D Shira uba dei u Myntri ba peit ïa ka tnat jngohkai pyrthei u la ïoh ban plie paidbah ïa ka Pine Home Eco Sustainable Project ha shnong Mawlangwir ha ka la mang pisa kaba T. 5.90 klur tyngka ba la pyntreikam lyngba ka Saitsnad Multipurpose Co-operative Society.
Lah ban kdew ba hapoh kane ka Pine Home ba la plie paidbah mynta ka sngi ka kyntup ïa ka restaurant, community hall, conference bad ka jaka ai jinghikai, ki kamra ban sah briew bad ruh ka Tourism Information Centre, bad kiwei kiwei de.
Ym tangkata, ha kajuh hi ka sngi na ka liang u Conrad Sangma u Myntri Rangbah ka jylla u la plie ruh ïa ka Twahlongwar Open-Air Museum kaba don ha Mawsynram, East Khasi Hills District.
Haba ai jingkren ha kane ka sngi, u Conrad Sangma, Myntri Rangbah ka Jylla u la ong ba ka jingtei ïa ka Pine Home ka pyni ïa ka roi ka par ban pynneh pynsah, ka jingstad tynrai kaba ki don bad ka jingpyndonkam lang ïa ka jingstad tynrai bad ka jingstad jong kane ka juk ba mynta. U la ong ruh ba kane ka Projek la pynwan dur ha ka jingïadei bad ka mei mariang, bad ym tangkata ka long ruh ka ban pynneh ïa ka jinglong jong ka, da kaba pyndonkam ïa ka jingsyaid lyngba ki bor jong ka mariang bad ban pynneh ïa ka um slap.
Namarkata, u la ong ba ai ba ka Pine Home kan dei ka karkhana kaba ïaid shaphrang bad kan ïai im bad ka Twahlongwar kan dei ka kamra klass kaba im bad ai ba ki Lynnong kan pynkylla ïa ka jinglong ka mariang, ka koit ka khiah, ki ïingbasaa ha kylleng ka jylla Meghalaya.
Kumta, u Myntri Rangbah u don ka jingkyrmen ban nang pyntyllun shuh shuh ïa ki kam lyngba kine ki ar tylli ki projek ki donkam ban don ka jingïatrei ryngkat ryngkat bad ka imlang ka sahlang, ki nongoh shrong ki ba na ka thaiñ bad kum juh ruh bad ki nongtrei kiba don bynta ban tei ïa ka.
Haba bynrap ïa ka jingkren ha kane ka sngi, u la ong ba ka sorkar jylla ka don ka jingthrang ban pynkylla dur ïa ka South West Khasi Hills kum ka jaka ba ki nongwan jngohkai kin sah kham bun sngi bad noh synñiang ha ka ïoh ka kot jong ki paidbah ka thaiñ bad da kaba pynpaw ba ka sorkar lyngba ka CM Homestay Mission, ka thrang ban sdang kumba 3,000 tylli ki homestays ha kylleng ka jylla haduh u snem 2028, ka ban long ka lad ban ai kam ai jam ïa kiba bun khamtam eh ïa ki khun samla.
U la bynrap shuh shuh da kaba ong ba ka sorkar ka sdang ia kine shibynta ban kyntiew ia ka kam jngohkai pyrthei, ban pynkhlaiñ ia ka jinglongtrai jong ka shnong ka thaw bad ban peit ba ka ïoh ka kot kan neh bad ki paidbah jong ka thaiñ.
U la pyntip ruh sha ki paidbah ki ba wan ban sakhi ha kane ka sngi ba, lyngba ka Chief Minister’s Research Grant, kumba 48 ngut scholars ki ïoh ka jingkyrshan na ka sorkar ha kane ka snem ba nyngkong. “Bad lyngba ka ‘Tracing the Roots’, 75 ngut ki stad kot kin leit sha Vietnam, Cambodia bad Tibet ban pule ïa ka jingsdang bad ka jingïaid lynti jong ki paid briew lum jong ka Khasi, Jaiñtia bad Garo.
Ban shu kdew ba ka jingwan dur jong kane ka projek kaba heh kaba kot haduh T. 5.90 klur tyngka ka dei lyngba ka jingïatreilang jong bun ki tnat sorkar bad ki kynhun kiba ïa don bynta lang kum ka Tourism Department, Meghalayan Age Ltd., Picasso Pupils, EMAGE Architecture, ka Saitsnad Multipurpose Co-operative Society, bad ka shnong Mawlangwir bad Wahmawpat.
Kiba la wan ban sakhi lang ha kane ka sngi ki kynthup ïa u Dr. Shakil P. Ahammed, u Chief Secretary, ka kong Rosetta Mary Kurbah, Commissioner & Secretary, ka kong A.L. Mawlong, IAS, Deputy Commissioner, South West Khasi Hills District, u bah B. Jyrwa, MPS, Superintendent jong ki Pulit ka South West Khasi Hills District, ki nongmihkhmat jong ki lai tylli ki constituency ka Mawkyrwat, Ranikor bad Mawsynram, u Pa’iem N. Syiemiong, u Syiem ka Hima Maharam Syiemship, ki ophisar na ka district, ki nongïalam shnong, ki kynhun kiba don byntalang bad kumjuh ruh ki paidbah nongshong shnong.