Kner kti Isynei ki nongñiah taksi ka thaiñ Kynshi sha ki 16 tylli ki longïing ba duk

Nongstoiñ, Nailar 17: Ka Kynshi Area Local Taxi Drivers and Owners ha ka 15 tarik u Nailar 2026, kum shi bynta ban rakhe ïa ka sngi laitluid ka ri India, ka la kner kti ban leh isnei ïa ki 16 tylli ki longïing na ki 8 tylli ki shnong kiba don ha Kynshi Pyllun bad Shyrwang.
Ha kane ka sngi la pynlong ïa ka jingïalang kaba lyngkot ha kaba la pynïaid da u President u Bah Donkupar Nongsiej ryngkat ka jingïadonlang ki dkhot jong ka Association kiba dei ki trai kali bad nongñiah kali.
U kongsan ha kane ka charity programme jong ka Association u long u MDC jong ka Pariong-Mawthadraishan u Bah Powell Sohkhlet, ha kaba la ïadonlang ruh u Sordar ka Kynshi Mawria, u Bah J. Dkhar, u Sordar ka Kynshi Diwah Lawkariang, u Bah C. Syiemlieh.
U Bah Powell haba kren ha kane ka jingïalang, u la pynpaw ka jingsngewkmen ba kane ka Seng ki trai bad nongñiah taksi ha thaiñ Kynshi, ka la lah ban leh ïa kane ka kam kaba khraw ban ïarap lem ïa ki longing kiba duk.
U la ong ruh bad kum u Nongkitkam barim ka Association u la angnud ban don ki kam leh isnei kiba kum kine, hynrei kam shym la urlong. Kumta u pynpaw ka jingsngewnguh ïa ki nongkitkam ba mynta kiba la pynurlong ïa kane ka jingthmu ba bha jong ka Seng.
Da kaba noh synñiang lang sha ka Seng halor kane ka jingthmu ba bha jong ka, u Bah Powell u pynpaw ka jingkyrmen ba kane kan nym dei tang ka sien kaba nyngkong bad kaba khatduh ba ka Taxi Association kan leh ki kam iysnei. Hynrei nangne shakhmat kan ïai bteng ïa ki kam shakri bad ïarap ïa kiwei pat kiba donkam ki jingïarap.
U President ka Association haba pynïaid ïa kane ka jingïalang u la ong ba ka Seng ka la aiti ha ki Sordar jong ki phra tylli ki Shnong ban jied ïa ki longïing kiba dei hok ban ïoh ïa ka jingïarap. U la ong ruh ba kane ka jingïarap jong ki ïa ki paidbah ba duk, ka dei kum ka dak ka jingsngewnguh ïa ki paidbah kiba ju kyrshan ïa ki nongñiah taksi ha ka kamai kajih jong ki.
La ïoh jingkren ruh na u Sordar Kynshi Mawria u ba la ong ba baroh shikatta ki briew ki ju peit I beiñ ïa ki draibar taksi, hynrei kane ka jingleh ka Seng ki draibar taksi na Kynshi kan long ka nuksa ba bha ïa kiwei.