Ngi kwah ba ka sorkar kan pyndam noh ïa ka Jingpynsngew Paidbah ka Shree Cement: KSU

Khliehriat nailar 17 :- U President jong ka Khsi Students Union East Jaiñtia Hills District Unit, u bah Streamly.S.Suchen, u General Secretary, u bah Kwilnis.S.Suchiang lem bad ki dkhot mynta ka sngi ki la ïasnoh kti lang lem bad kiwei kiwei ki sengbhalang ha ka jingiakhih ba jai jai ba la pynlong ha Khliehriat, kane ka jingiakhih ka dei halor ki mat bapher bapher ba la dawa da ka seng bad khamtam ka jingdawa ba ïadei bad ka public hearing jong ka company Shree Cement ba la dep pynlong ha elaka Nongkhlieh.
U bah Streamly.S.Suchen u la ong ba kane ka jingiakhih ba jai jai, ka jingthang ïa ki tyngshop jong u myntri rangbah ka jylla, u Conrad Sangma, ki tyngshop jong ki symbud myntri rangbah, u Sñiawbhalang Dhar bad u bah Prestone Tyngsong bad ki tyngshop jong ki MLA , Kyrmen Shylla bad MLA, Santa Mary Shylla, ka long kum ka dak ka jing pynrem jur ïa ki namar ka jingïuhroit jong ki ïa ka hok longbriew man briew khamtam ka hok jong ki nongshong shnong kiba na East Jaiñtia Hills District, u la ong ruh ba “Ka synjam jong ka KSU hadien ba kut ka jingbuh por ha kaba ïadei bad ki san tylli ki mat ba la dawa nga ngeit ba ka KSU Central Executive Committee kan leh ïa kaba donkam bad ngi ieh ha ka jingstad jong ka KSU Seng kmie”
“Ka sorkar ka la thung ïa ka jingtohkit tangba ngim shaniah than ïa ka sorkar, kum ka seng bad kum ki paidbah ka East Jaiñtia Hills District ngi kwah ba ka sorkar kan pyndam noh ïa ka Public Hearing ba la pynlong ha elaka Nongkhlieh namar kam dei kaba ïaid beit bad kam shym la pynhun ïa kito kiba pyrshah ïa ka public hearing bad halor ki mat ba ka seng ka la dawa hap ban shim kam da ka cabinet jong ki myntri sorkar ban pynurlong kumba ka seng ka la dawa” ong u Prisident KSU na East Jaiñtia Hills District.