Shillong, Nailar 17 : Ka BJP ha Meghalaya ka don ïa ka thong ban ïakhun tyngeh nangne shakhmat khnang ba ha ka elekshon MLA kaban long ha u snem 2028 kin lah ban pynkut noh ïa ka jingdon tang arngut ki MLA kumba long baroh shi katta.
Halor kane, u Nongïalam ka BJP ba dei ruh u MLA bad Myntri barim ka sorkar jylla, Bah AL Hek u la ong ba hadien ka jingwad bniah kaba jur khatduh ki lap ïa ka daw tynrai kaba pynlong sah ïa ka party ban neh tang arngut ki MLA haduh mynta.
“Na ka liang ka party mynta ngi la sngewthuh bad lap ïa ka daw tynrai kaba pynlong ïangi ba ngin ym lah ban jop palat ïa ki 2 tylli ki constituency sha Iing Dorbar Thawain ka Jylla. Hynrei mynta ka party ka la shim ïa ki sienjam kiba mardor ban pynbeit ïa kane,” u la ong haba kren bad ki lad pathai khubor.
Ha kajuh ka por u la ïathuh ruh ba watla um pat lah ban ïathuh ïa bun ki MLA kiba mynta bad ruh ki MLA kiba rim kiba kwah ban pynïasoh noh bad ka party shwa ka elekshon 2028, hynrei u pynpaw ba ki dak ki shin ki pyni ïa ka dak jong ka jingkylla ha ka elekshon ban wan.
Shwa kane, u Bah Hek u la ïathuh ba ka jinglap jong ka seng ïa ki daw kiba ktah ïa ka party ban jop bun ha ka elekshon MLA kadei hadien ba ki la pynlong ïa ki jingwad bniah bad dei hadien ba ki la leh ïa kane ki shem ba donkam ban tuklar mardor khnang ba kin lah ban pynkut noh ïa ka jingdon tang arngut ki MLA naduh u snem 2028 shakhmat.
Une u nongmihkhmat uba la bat ruh kum u Myntri la bunsien u la ïathuh ba kumba long mynta hi, ki la don bun bha ki riewpawkhmat nalor ki MLA kiba kwah ban pynïasoh sha ka party. “Hynrei ïa mynta hi ka dang kloi palat ban pynpaw paidbah ïa ka kyrteng namar ha ka sainpyrthei hi katba dang leh ban buhrieh katta ka nang bha,” u la ong.
Shuh shuh u la iathuh ba mynta ka jingïakren ka dang ïaid bad bun ki riewpawkhmat kumjuh ki nongmihkhmat ba mynta bad kiba rim kiba thrang ban don bynta noh bad ka BJP.
U Bah Hek u la pynpaw ruh ba kadei ka thong jong ka party ban phaikhmat sha kii khun samla na ka bynta ban pynkhlain shuh shuh ha ka sainpyrthei ha kane ka jylla.
“Ngi donkam ïa ka pateng thymmai ban don ha ka saiñ pyrthei. Ha ka bynta jong nga, nga la shakri palat 30 snem ha ka saiñ pyrthei, kumta ngi dei ruh ban ai lad ïa ki khun samla jong ngi ban rung sha ka saiñ pyrthei,” u la ong.
Lah ban kdew hangne ba ka BJP ka don tang arngut ki MLA haduh mynta bad kine ki kynthup ïa u Bah AL Hek MLA ka Pynthorumkhrah bad u Bah Sanbor Shullai MLA ka Shillong South bad Myntri Sorkar ka Jylla.
