Na ka jingïatai nia ban ïoh thep vote tang ki trai ri poi ïa kawang para MDC hapoh Dorbar GHADC

Tura, Nailar 7 : Ka Dorbar Synrai ka Garo Hills Autonomous District Council (GHADC) ha ka Sngi Thohdieng, ka la huri hura bad poi sha ka jingïakawang hapdeng ki MDC kata u Nikman Ch Marak bad Alphonsus R Marak hadien ka jingïania kaba jur hapoh ka Dorbar.
Kane ka huri hura kala mih na ka jingïatai halor ka jingtyrwa amendment ïa ka GHADC Rules kaba shah tang ïa ki nongthep vote kiba dei ki Scheduled Tribe ne ki riewlum (ST) ba kin ïashim bynta ha ka elekshon ka GHADC.
Ka amendment, kaba la khmih lynti ban wanrah bad mynjur ha ka Sngi Thohdieng, la hap ban pynkynriah noh sha ka Lah Sngi U Blei , kaba la pynmih ïa ka jingpyrshah na ki katto katne ki dkhot.
Ha ka jingïatai, u MDC Nikman Ch Marak ula pyrshah jur ïa ka jingpynkynriah bad dawa ïa ka amendment dei ban mynjur noh mardor ha ka jaka ban buhteng. Kane ka jingïapher jingmut ka la pynmih ïa ka jingïania kaba jur hapdeng ki arngut ki MDC, kaba la lam shaduh u pud ban ïashoh hashuwa ba kiwei pat ki MDC kin tuklar.
La khmih lynti ba ka ïing Dorbar kan sa ïakren ïa kane ka amendment ha ka Lah Sngi U Blei.