Ka BJP ka pyrshah ban tih Uranium tangba ym kwah ban pynkynriah ïa ka ophis AMD : Hek
Ngi ieh ha ka Sorkar Pdeng bad Sorkar Jylla halor ka lynti rel
Shillong, Nailar 7 : U Nongïalam ka BJP bad MLA ka Pynthorumkhrah Bah AL Hek ula ong ba ka kam pynpoi lynti rel ba la sahteng la slem bha ha Meghalaya ka dei mynta ban shim rai da ka Sorkar Jylla bad ka Sorkar Pdeng, haba buh hakhmat ïa ka jingmyntoi u paidbah.
Haba kylli halor ka jingslem ban pynbeit ïa kane ka kam, u Bah Hek ula ong ba kane ka kam ka la sahteng la slem bha.
“Kane kawei ka la sahteng la slem bha. Kumta mynta ngi ieh ha ka jingstad jong ka SorkarJylla bad ruh ka jingstad ka Sorkar Pdeng ban wanrah ïa ka lynti rel sha Meghalaya” ula ong.
U Bah Hek ula bynrap ba ïa ka project dei ban buddien tang lada ka ai jingmyntoi ïa ki paidbah ka Jylla.
Halor ka kam tih Uranium pat une u Nongïalam ka BJP ula ong ba ka party kan ym kyrshan satia ïa ka jingtih uranium ha Meghalaya lada ki paidbah ki pyrshah ïa ka, haba kyntait pat ban pdiang ïa ka jingdawa khang khyrdep ïa ka ophis ka Atomic Minerals Directorate (AMD) ha Shillong.
Haba kren sha ki lad pathai khubor, u Bah Hek ula kren shai baka nongrim jong ka BJP ka long kat kum ka jingsngew u paidbah.
“Katba ki paidbah kim kwah ban tih uranium, ngi ruh ngim kwah ban ïaid pyrshah ïa ka bha ka miat u paidbah” ula ong.
“Nga la ong ha phi naduh kaba sdang ba kum ka Sorkar ngim lah ban ïaid pyrshah ïa ka bha ka miat u paidbah. Kumta, haba ki paidbah kim kwah tih uranium, ngi ruh ngi don ryngkat bad ki paidbah ka Jylla” ula bynrap.
Halor ka jingdawa ban weng noh ïa ka Ophis ka AMD na Shillong, u Bah Hek ula ong ba kam don daw satia ban leh ïa kane.
“Balei ban weng ïa ka? Ngi la ong ba ngin nym ailad ban tih uranium. Hynrei kumno phi lah ban ong ba dei ban weng noh ïa ka Ophis ka AMD na Shillong? ïa kane hi ngam mynjur satia” ula ong.
U Bah Hek ula pynksan ba ki nongtrei ka AMD kila trei ïa la ki jong ki kam kum ki nongtrei ka Sorkar Pdeng bad ka jingdon jong ki hangne kam mut ba ka jingtih par kan jia.
“Ki dei ki nongtrei Sorkar. Ki la trei kumba treikam ki Ophis ka Sorkar. Shisien ba ka Sorkar Meghalaya bad ki paidbah kim shah ban tih uranium, ka kut noh hangta” ula ong.