Nongpoh, Naitung 30: Ban pynkhlaiñ ïa ka jingpynkhreh bad ban ai jingïarap kyrkieh ha ki por ba jia kino kino ki jingshah lynshop haki bor mariang, ka District Disaster Management Authority (DDMA), Ri Bhoi District, mynta ka sngi ka la sam ïa ki Emergency Response Kits sha ki 178 ngut ki Aapda Mitra Volunteers kiba la dep shah pyntbit kum ki nongïarap ba nyngkong (First Responders) haka jingïalang kaba la long ha District Library, Nongpoh.
Kine ki Aapda Mitra Volunteers ki dei ki nongtrei mon sngewbha kiba la ïoh ïa ka jinghikai kaba bñiah halor ki rukom ai jingïarap, jingïada ha ki por ba don ki jingjia ba kyrkieh, khamtam eh haba jia ki jingshah lynshop ha ki bor mariang. Ka jingthmu ka long ban pynthikna ba ki paidbah kiba shah ktah kin ïoh jingïarap kloi bad kaba biang ha ka por kaba donkam tam.
Lyngba kitei ki Emergency Response Kits kitei ki samla ki lah ban pyndonkam ha kano kano ka por ba donkam kyrkieh ne ki jingjia kiba wan naka bor mariang.
Ka DDMA ka la ong ba ka jingsam ïa kine ki kits ka dei kawei na ki sienjam ba kongsan ban pynkhlaiñ ïa ka rukom pynkhreh jong ka district haba ïadei bad ki jingshah lynshop haka bor mariang. Lyngba kane, ki Aapda Mitra Volunteers kin nang lah ban ïatreilang bad ki tnat sorkar, ki kynhun ban ai jingïarap bad jingïada ïa kiba shah ktah ha ka por kaba biang.
Ïa kine ki kits la sam ha ka jingïalang kaba la long ha District Library, Nongpoh, ha kaba la donlang u MLA ka Nongpoh Constituency, Bah Mayralborn Syiem, ka Kong Balakyntiew Ranee, ADC, Bah J. Mawthoh, District Disaster Management Officer (DDMO), Ri Bhoi District, Bah B.K. Swer, Deputy Controller, Civil Defence, Nongpoh, ryngkat bad baroh 178 ngut ki Aapda Mitra Volunteers.
