Bun ki bympat sngap ïa ka jingbthah ka Hima Mylliem bad ym pat lah pynkylluid ïa ki lynti ha Ïewduh

Shillong, Naitung 30: Watla na ka liang ka Dorbar jong ka Hima Mylliem ha kane ka taïew ba la dep ka la bthah ïa baroh kiba die dukan hapoh Ïewduh ba kin dei ban pynkylluid noh ïa ki lynti ïaid kjat hapoh ka ïew da kaba ym dei ban pynmih palat ïa ki tiar napoh ki dukan jong ki, hynrei haduh kine ki sngi kane ka jingbthah jong ka Hima kam pat longdoh longsnam satia hapoh Ïewduh.
Ïa kane la lap ba ki lynti ïaid kjat jong ki paidbah sha jan baroh ki basa ki dang long hi kiba khapngiah bad dang bun na kiba die jingdie, khamtam ki dukan jong ki bar jylla, ki dang pynneh hi kumjuh kumba la ju leh naduh ki por kiba mynshwa.
Ym lah ban len pat ba ki la don ruh katto katne tylli ki Basa hapoh ïew ba ka jingpyrshang jong kiba die bad shong dukan ka la sdang ban treikam, naba la ïohi ba ki la burom ïa ka jingbthah jong ka Hima Mylliem bad ki la sdang ban pynkylluid ïa ki lynti da kaba ki khlem kyntur shuh ban die bad sei ïa ki mar ki mata jong ki shaduh ki lynti ïaid jong ki briew kiba wan ïew wan hat bad kiba thied jingthied.
Lah ban ong ba Dorbar jong u Syiem ka Hima Mylliem, lyngba u Acting Syiem u Paiem Alban Fredrick Syiem ka la bthah ïa baroh kiba die jingdie hapoh Ïewduh la ki dei kiba shongdie madan bad kumjuh ruh kiba shong hapoh dukan ba kin ym sei palat ïa ki mar ne phriang pyntam ïa ki mar ki mata shaduh ki lynti ïaid naba kane ka pynkhapngiah bad ka pynbun ruh ïa ki nongtuh nongthiem bad kiba kloh pla hapoh Ïewduh.
Kane ka jingbthah jong ka Hima Mylliem ka long ruh na ka bynta kito ki bar jylla kiba shong dukan kiba sei tam ïa ki mar ki mata shaduh shajan lynti ïaid paidbah bad kane ka jur bha ha ki basa kiba khim bha.
Ka Hima ha kine ki sngi ka la ai jingmut ruh ba ha ka jaka ban phriang bun ki mar ki mata shabar dukan dei ban buh beit ïa ki mar tang hapoh dukan bad ban ailad lang ïa kiba die madan ban ïoh pynkylluid ïa ka ïew da kaba ïatreilang kumne ka Hima ka la pynpaw ba ka Ïewduh kan sa long kaba itynnad bad kaba kylluid bad lait na ka jingshah tuh shah thiem bad shah kloh pla.