Mynjur ka MHA ïa ka jingdawa ka HYC, pdiang ban buh ïa ka Zonal ophis ka NCB ha Shillong

Shillong, Naitung 30: Ka Hynñiewtrep Youth Council (HYC) sengkmie ka la pynpaw ïa ka jingai khublei ïa ka sorkar pdeng kaba la pdiang ïa ka jingdawa jong ka seng kaba la pynsngew ba donkam ban buh ïa ka Zonal Office jong ka Narcotics Control Bureau (NCB) ha Shillong.
Halor kane u President Rangbah ka seng u Bah Roy Kupar Synrem u la ong ba ka seng ka pdiang sngewbha bad ai khublei ïa ka sorkar pdeng kaba la pdiang ïa kane ka jingdawa jong ka seng ban buh ïa ka NCB ha Shillong.
“Ka Ministry of Home Affairs ka ai ka jingmynjur ba ïoh ïa ki Zonal Office jong ka Narcotics Control Bureau (NCB) ha Shillong bad ha ki san tylli kiwei pat ki jaka jong ka ri India. Kane ka long ka sienjam kaba khraw sha ka Meghalaya kaba lait na u drok kaba shngaiñ bad kaba khlaiñ. Ngi ai khublei ïa ka sorkar India na ka bynta ka jingpdiang ïa ka jingdawa jong ngi bad ka rai kaba donkam eh na ka bynta ka bha ka miat jong u paidbah bad ki pateng ban sa wan,” ong u Bah Roy Kupar Synrem.
U la ïaiban da kaba ong ba ka HYC kan bteng ban pynsawa ïa ka sur jong u paidbah bad ban trei na ka bynta ka Meghalaya kaba kham bha, kaba sngaiñ bad kaba roi kaba san. “Ong em ïa u drok, Hooid ïa ka jingim,” da ka jingkitkhlieh ngin lah ban tei ïa ka Meghalaya kaba lait na u drok,” pynkut u President ka HYC u Bah Roy Kupar Synrem.