Da ki tiar kjit lyer jaboh na Mumbai, yn wanrah kum ka Pilot Project ha Byrnihat

Nongpoh, Naitung 29: Naka bynta ban tehlakam ïaka lyer jaboh haka thaiñ Byrnihat, kaba la ioh nam ruh kum kawei naki thaiñ ba jaboh tam ka lyer haki khyndiat snem bala leit noh, u MLA ka thaiñ ba dei ruh u myntri sorkar ba dei peit ïaka tnad C&RD u Bah Sosthenes Sohtun u la shimkhia ban wanrah da ki tiar ban kjit ïaki lyer jaboh lyngba kawei ka kompani kaba la tip kum ka Zero Carbon Tech24 Pvt Ltd na Mumbai.
U tei u tiar kjit jaboh u dei u ba la tip kum u WARO C6 bala shna ha kata ka rukom ban kjit ïaki tdem jaboh da kaba pyndonkam ruh da ka bor jong ka sngi ha kaba ka lah ban pynmih haduh 30 litar ka lyer khuid haka shi sekon.
Ban pynthikna ïaka rukom treikam utei u tiar kjit lyer jaboh, naka liang ka tnad Meghalaya State Pollution Control Board (MSPCB) kala pynlong ruh ka jingwad bñiah kumba 2 sngi lynter da kaba pyndait ïa utei u tiar haki 2 jaka bad kumba 4 tylli ki mashin ha kaba la lap ba ka lyer jaboh ka duna shisha bad kham khuid haba nujor bad kaba ju long.
Naka liang u Bah Sosthenes Sohtun mynta ka sngi u la lum da ka jingïalang ryngkat ki ophisar ka tnad MSPCB, ki nongïalam shnong, ryngkat ki nongmihkhmat na katei ka kompani ban pynshai paidbah ba kumno utei u tiar u treikam khamtam ka Byrnihat kadei kawei naki jaka kaba la iohnam kum ka shnong ba jaboh tam ka lyer, namar naka liang u MLA u don ka thong ban pyndait ïa kitei ki tiar kum ka pilot project jong ka sorkar ban pynduna bad ban tehlakam ïaka lyer jaboh.
Haba kren sha ki lad pathai khubor hadien ka jingïalang naka liang u Bah Sosthenes Sohtun u la ong kumba ka Byrnihat ka dei ka jaka ba jakhlia tam ka lyer, hynrei bun ki paidbah ki dei ban sngewthuh ruh ba sha shilliang ka dei ka Assam kaba bun bha ki karkhana pynmih tdem, bad haba ïadei bad kane naka liang u MLA u la ong ba ka long kaba donkam ban don ki prokram ban ai jingpynshai sha ki paidbah ha kaba dang shen la lum da ka jingïalang ha Byrnihat bad kala don ruh kawei ka kompani kaba la mih shakhmat ban pyntip halor ki tiar ba lah ban kjit ïaka lyer jaboh bad wanrah ïaka lyer kaba khuid ba suba.
U la ong ruh ba mar mar u la kyrpad bad pyntip sha u Myntri Rangbah ka jylla u ba la phah ïaki ophisar ka MSPCB naka bynta ban pyrshang bad ban wad bñiah ïaka jingtreikam utei u tiar khnang ban pynthikna haduh katno utei u tiar u treikam ban pynduna ïaka lyer jaboh, bad naka liang ka MSPCB kila lap ba kine ki tiar ki lah ban pynduna bad tehlakam ïaka lyer jaboh ha katei ka thaiñ.
U la ong ruh ba lada dei ban pyntreikam ïa katei ka pilot project ba nyngkong ha kane ka thaiñ, ki karkhana kim dei ban ïaid lait ïakino kino ki kyndon bad ki tiar ba ki dei ban pyndait ban pynduna ïaka lyer jaboh, khnang ba ki paidbah kin ioh ban ring mynsiem ïaka lyer kaba khuid.
Haba ioh ruh ban ïakren bad u Bah GH Chyrmang Member Secretary ka MSPCB u la ong ba haka jingpyrshang ban wad bñiah kitei ki tiar ki treikam shisha ban pynduna ïaka lyer jaboh ha katei ka thaiñ, namar ka lyer jaboh kam dei tang naki karkhana hynrei ha surok bah ruh bad ïaki karkhana dang lah ban tehlakam, hynrei ka long kaba eh ïaka lyer jaboh kaba mih na surok kumba kine ki tiar ki donkam ban pynduna ïaka lyer jaboh ha baroh kawei ka thaiñ Byrnihat.
U la ong ruh ba ka nam jaboh ka Byrnihat ka dei kaba la mih ha u snem 2024 hynrei haba phai mynta ka lyer jaboh kala duna bad ki ophisar kila trei shitom shikatdei ban tehlakam ïaki karkhana bad ban tip shai ïaka jingtreikam kitei ki tiar donkam ban sdang noh ïa katei ka pilot project kumba la angnud.