Ka Meghalaya kam dei ka daw jongka jingshlei um ka Assam donkam ka jingïatreilang: Dy.CM

Shillong, Naitung 29 : U Symbud Myntri Rangbah Bah Prestone Tynsong ha ka Sngi Balang ula ong ba ka Meghalaya kam dei ka daw jong ka jingshlei um ha Assam, haba pynksan ba ka jingeh ka mih na ka jinglong ka jaka bad ka jingbym biang ka rukom shna ia ki nala.
Haba jubab ïa ki jingkynnoh ba mih man ka por, u Bah Prestone ula ong ba ka Jylla Meghalaya kaba long lum, kam dei satia ka daw jong ka jingshlei um sha ki bynta ba shapoh ka Assam.
“Phi donkam ban leit hi dalade bad peit. Ka jingshlei um kam shym la jia ha ki jaka lum. Ki jia ha ki jaka them” ong u Bah Prestone haba ïakren bad ki nongthoh khubor.
Ula kdew ïa ka jingbym biang ki nala bad ka rukom saiñ dur ïa ka jingtuid ka um kum ka daw ba kongsan eh kaba wanrah ïa ka jingsahkut ki nala tuid um ha ki jaka them bad ong ba ïa ka rukom hap slap hi ka dei ka bym lah ban batai lypa.
“Haba phi don ha jaka them, lada ïa ki nala bad ki jingshna kim dei kiba la saiñdur bha, kum kine kiei kiei kin jia” ula ong.
U Symbud Myntri Rangbah ula ong ba ka jingkynnoh ïa ka Meghalaya man ka por ba shlei um ka dei ka bym ïahap satia bad ban jur ïa baroh artylli ki jylla ban ïashim lang ïa ka jingkitkhlieh.
U Bah Prestone ula ïathuh ba ki consultant ba thung da ka Jylla bad ka Sorkar Pdeng, dei ban bthah ba kin pynrung ïa ki nala kiba biang bad ki culvert kiba heh ha baroh ki project ba thymmai.
“Ki consultant, la ki dei kiba thung da ka Jylla ne Sorkar Pdeng, ki hap ban pynthikna ïa ka jingshna nala kiba paka, ki culvert kiba biang. Kine ki dei ban shimkhia ha ki project ki ban mih thymmai” ula ong.