Kyntu ka HYC ïa u Lat ban shimkhia ïa kane ka mat bad ka President jong ka ri India

Shillong, Naitung 29: Ka Hynniewtrep Youth Council kala kyntu ïa u Lat ka jylla Meghalaya ban tuklar mardor ha kaba ïadei bad ka jingthung ïa u Acting Vice-Chancellor jong ka North-Eastern Hill University, namar ba ka Sorkar Pdeng kala pynmih ïa ka hukum kaba la long pyrshah ïa ki aiñ jong ka skulbah.
Ha ba kren bad ki lad pathai khubor hadien ba la dep kynduh ïa u Lat ka jylla uba dei ruh u Chief Rector ka NEHU u CH Vijayashankar ha ka sngi Balang, u Bah Roykupar Synrem u buh jingkylli ba kumno ka Ministry of Education kala pynmih ïa ka hukum ha ka 22 tarik u Naitung ban pynkhamti ïa ka kam VC ha u Prof Saroj Kanta Barik, da kaba pynpaw ba udei uba wan baar ha ka kyrdan jong ki nonghikai kiba la rangbah tam ha ka skulbah, hadien ba ka samoi treikam jong u VC uba rim kala kut noh.
U Bah Roy u la ong katei ka jingshim rai kala long pyrshah ïa ka Statute 2(A) Clause (2) jong ka NEHU Statutes, 2013, kaba kdew shai ba ïa ka kam dei ban pynkhamti ha u nonghikai uba la rangbah tam ha ka kam, haba kam pat don satia kano kano ka jingthungkam kam kaba pura.
U Bah Roy u la ong, Ka statute ka long kaba tehpyrkhing bad kam lah ban pdiang da kumwei pat tad lada u nonghikai uba la rangbah tam ym lait, um long uba bit ba biang ne um long uba kloi ban shimti ïa ka kam.
“Ki Statutes kiba la thaw hapoh jong ka NEHU Act ki don ïa ka bor jong ka ain.Kano kano ka jingshim rai ki bor pynïaid kam lah pat ban ïaid lait ïa katei ka kyndon ain kaba la kdew” la ong u Bah Roy.
Shuh shuh u Bah Roy u la pynpaw ba ka NEHU ka lah dep ban ïaid lyngba ïa ki por jong ka jingbym biang ïa ka rukom pyniaid bad ong ba ka long kaba kongsan ba kano kano ka jingthungkam kaba nangne shakhmat kadei ban bud ryntih ïa ki kyndon ain bad pynneh ïa ka jinglong ba kyrpang bad ban ioh ïa ka jingshaniah na ki paitbah.
U Bah Roy lem bad ka kynhun kiba la leit ban kynduh kila kyntu ïa u Lat ba un shimkhia lang ïa kane ka mat bad ka President ka India kaba long ka Visitor bad ruh bad ka Ministry of Education.
Kila pynpaw ba dei ban pynbeit biang ïa ka hukum kaba la pynmih ha ka 22 tarik u Naitung, da kaba bud ryntih ïa ka Statute 2(A)(2) bad ban pynthikna ba kino kino ki rai kiba la shim da ki bor pyniaid ka NEHU nangne shakhmat kidei ban bud ryntih ïa ki kyndon ain bad ïa ki Statutes.
U Bah Roy u la pynpaw ba ka rukom trei ïa ka kam kadei ban ïaid ha ka lynti kaba khuid ba suba kaban btin da ki kyndon ain ïa ka rukom pyniaid kam ïa ka skulbah bad kano kano ka jingleh kiar, wat la kadei kaba la kdew shai bha, kan pyntroin ïa ka bor treikam jong ka skulbah bad ban khring ruh ïa ki jingeh ha kaba ïadei bad ki ain ki kanun.