Ka Sorkar ka khlem beh ïa ki nongdie madan ka shu pynkynriah sha ki jaka ba la shna kyrpang: Prestone

Shillong, Naitung 29: Ka Sorkar Meghalaya ka la kyrpad ïa ki nongdie madan bad kiba don bynta ha kane ka kam ba kin kyrshan ïa ka jingthmu ka Sorkar ban pynkynriah ïa ki nongdie madan sha ki jaka bala ithuh bad shna kyrpang, ha kaba u Symbud Myntri Rangbah ka Jylla u Bah Prestone Tynsong u la ban jur ba ka jingpynkynriah kam dei ka jingleh donbor ne ka jingbeh noh ïa ki hynrei shu pynkynriah ïa ki sha ki jaka ba la shna kyrpang na ka bynta jongki hi.
Haba kren sha ki lad pathai khubor u Bah Prestone u la ong ba kane ka jingthmu ka long ban pynduna ïa ka jingkhapngiah ha ka sor Shillong bad ban pynthikna ïa ka jingsuk haka leit ka wan ki paidbah baroh shisngi.
“Nga kyrpad ïa baroh kiba don bynta ban ïatreilang bad ka Sorkar. Kane ka jingthmu ka long kaba kongsan bha ïa ngi. Ngim beh ïano ïano. Ngi shu pynkynriah ïa ki sha ki jaka ba la buh kyrpang, bad yn siew ruh ïa ka bai kynriah sha ki jaka ba la ithuh kyrpang” la ong Bah Prestone.
U Bah Prestone ula bynrap ba ka jingthmu ba kongsan jong ka Sorkar ka long ban thaw ïa ka jaka sor kaba kham ryntih bad kiba kylluid da ka ba buh ruh hakhmat ban ïada ïa ka kamai kajih jong ki nongdie madan.
“Ngi kwah ba ki paidbah kin suk, ha ka por mynsngi bad mynmiet. Dei na kata ka daw ba nga kyntu ïa baroh ban ïatreilang,” u la ong.
Haba jubab ïa ki jingkynthoh na ki katto katne ki kynhun, u Symbud Myntri Rangbah ula pynshai ïa ka nongrim jong ka Sorkar.
“Nga la ïohi ba ki don ki briew kiba kylli balei ka Sorkar ka beh noh ïa ki. Kata kam dei satia. Kane ka dei shaphang ka jingpynkynriah sha kiwei pat ki jaka, ym ka jingbeh noh syndon ïa ki. Yn pynkynriah ïa ki nongdie madan sha ki jaka kiba biang, bad yn ai jingïarap pisa na ka bynta ban pynkynriah sha ki jaka thymmai” ula ong.