Lyngba u Lat ka jylla, kyrpad ka HYC ban ïakren bad ka Sorkar pdeng ban buh da ka NCB ha Meghalaya

Shillong, Naitung 29: Namar ka jingnang kharoi ba sted bha jong u drok hapoh ka Jylla Meghalaya kaba dei ka lynti pdeng ban pyniasoh sha kiwei pat ki jylla ka thain North East, Ka Hynñiewtrep Youth Council (HYC) ka la kyntu ïa u Lat ka Jylla u CH Vijayashankar ban ïakren bad ka Sorkar Pdeng halor ka jingdawa ban buh noh daka ophis jong ka Narcotics Control Bureau (NCB) kaba pura ha Meghalaya.
Haba kren bad ki lad pathai khubor hadien ba la dep ban kynduh ïa u Lat ka jylla u Bah Roykupar Synrem uba dei u President u la ong ba ka jingdih drok ka la kylla long ka jingeh ha ka imlang sahlang bad ka jingdon ka Meghalaya ka long kum ka lynti bah sha kiwei pat ki jylla kala pynlong ïa ka Jylla kum ka jaka pyniaid lynti ïa u drok.
“Ngi la kyrpad ïa u Lat ban ïakren bad ka Ministry of Home Affairs ka Sorkar Pdeng ban buh noh ïa ka Zonal Office kaba pura jong ka Narcotics Control Bureau ha Meghalaya” ong u Bah Roy.
Shuh shuh u la ong, “Ka Council kala ban jur ïaka jingdonkam jong ka ïatreilang kiba kham khlaiñ hapdeng ka NCB, ki BSF, ki pulit jong ka jylla bad custom bad ban pynkhlain ïa ka jingpeitngor ha ki jaka rung jong ka Jylla”.
Haba ïadei bad ka ki jaka puta, u Bah Roy u la kdew ïa ka jingbteng jong ka jingdon kiba buhai shnong beain ha Lum Survey, mar pyrshah ïa ka Fire and Emergency Services Station ha Iewduh, ha ka jaka ba dei trai da ka ophis Defence Estate.
U Bah Roy u la ong, Ngi la kyrpad ïa u Lat ban rah ïa kane ka mat shaka tnat Ministry of Defence and Ministry of Home Affairs ban pynshisha ïaki briew bad haka juh ka por ban weng ïa ki ba sah beain.
U Bah Roy u la pynpaw ruh ïa ka jingkynnoh ba ym shym la pyntreikam ïa ka Reservation Policy ha ki ophis treikam jong ka Sorkar Pdeng ha Meghalaya.
Da kaba kdew ïa ki kyndon jong ka DoPT, u la ong ba ym shym la bud ïa ka bhah ba la buh kaba long 1% na ka bynta ki SC, 44% na ka bynta ki ST bad 5% na ka bynta ki OBC ha ka jingpynrung kam ha ka thup C bad D.
Ka HYC ka la kyntu ïa u Lat ban ïakren bad ka Department of Personnel & Training na ka bynta ban bud ryntih ïaki kyndon bala buh.
Ha kaba ïadei bad ka koit ka khiah, u Bah Roy u la ong ba ka NEIGRIHMS ka dei ban pyntreikam ïaka Female-to-Male Ratio naka bynta ban thungkam Nurse kumba leh kiwei ki jaka sumar ban ïada ïa ka burom jong ki nongpang khamtam ïaki kynthei bad khynnah.
Ka HYC ka la kyrpad ïa u Lat ban ïakren bad ka Ministry of Health & Family Welfare ka Sorkar Pdeng ban ioh ïa ka jingmynjur ïa kane ka policy naka bynta ban pyntreikam ha Meghalaya.