Ujor ejahar ka samla ba dang sdang ïasaid aiñ pyrshah ïa u nongïasaid aiñ halor ka jingkynnoh jrongkti

Shillong, Naitung 29 : Ki Pulit jongka East Khasi Hills ki la rejister case ïa ka ejahar pyrshah ïa uwei u Nongïasaid aiñ ba la rangbah hadien ba ki la ïoh pdiang ïa katei ka jingujor na kawei ka samla ba dang sdang ïasaid aiñ kaba ïatrei lang bad u halor ka jingkynnoh ba u jrongkti ïa ka hapoh ka ophis treikam jongu ha Keating Road.
U SP (City) u bah Dangsan Khyriem u la ong ba ïa kane ka jingujor la ïoh pdiang ha ka 28 tarik Naitung bad la rejister case ha ka kyndon Bharatiya Nyaya Sanhita.
“ Ha ka 28 tarik Naitung la ïoh pdiang ïa ka jingujor da ka jingthoh na kawei ka samla ba dang sdang ïasaid aiñ kaba la kynnoh ba ha ka ophis treikam jong uwei u Nongïasaid Aiñ uba ka ïatrei lang ban hikai ïa ka kaba don ha Keating Road, katba ka dang ïashong kai bad ki paralok kiba dang ïa sdang ïa ka kam ïasaid aiñ hapoh ka jinghikai une u Nongïasaid Aiñ une u Nongïasaid Aiñ ula khot ïa ka shapoh ka kamra treikam jongu bad u la sdang ban jrong kti bad leh kynshleiñ ïa ka. Hynrei ka la ïaksaid bad khynniat ïa u” ïathuh u bah Dangsan.
Ka la ïathuh ba ula khot biang ïa ka ban rung shapoh ka kamra treikam jongu bad hangta ruh u la pyrshang biang ban leh tam. Kumta ka la hylla bad ïathuh ïa kaei kaba la jia ha ki paralok jongka.
Ka la kynnoh ba u la tyrwa ïa ka da ka pisa bad ong ruh ïa ka ban wan ïa kynduh ïa u la Sngi Saitjain.
Kane ka samla ka la phet bak na katei ka ophis utei u Nongïasaid aiñ bad leit ai ka jingujor sha ki pulit ha Sadar Police Station.
Halor kane ka jingujor ki pulit ki la sdang ïa ka jingtohkit jongki bad hadien kata ki pulit kin sa leh ïa kaba donkam kat kum ka ain.
Ha kawei pat ka liang, na ka liang ka Hynniewtrep National Youth Front (HNYF) ka la pynïaid kjat ïa une u nongïasaid aiñ ba shah kynnoh jrong kti ïa kawei ka samla ba dang sdang ïasaid aiñ bad shah hikai ha une hi u Nongïasaid aiñ, ryngkat ka bat skhor ha nongbah Shillong, kumba la paw na ka video kaba la saphriang paidbah.
Hadien kane ka jingjia, ka State Bar Association kala pyntip ïa kane ka jingjia sha ka Chief Justice ka ïing Bishar High Court ka Jylla halor ka rukom shah pynjah burom une u nongïasaid aiñ.
ïa kane ka jingjia la dep ban pyntip da ka jingthoh sha ka Chief Justice, ong ka khubor ba ïajan bad ki nongïasaid aiñ.
Kane ka jingjia ka la paw pyrthei hadien ba kane ka Intern ka la leit ujor da ka ejahar ha Sadar Police Station ba kynnoh ba ka shah jrong kti ha une u nongïasaid aiñ, uba la tyrwa ïa ka da ka pisa ba kan sngap jar ïa kaei kaba jia.