New Delhi, Naitung 27: U Myntri Rangbahduh, Narendra Modi mynta ka sngi u la ïakren bad ki nongïashim bynta ha ka Viksit Vibrant Village Programme (VVVP) 2026. Da kaba kdew ïa ka jingïashim bynta ha kylleng ka ri, u la ïaroh ïa ka jingïashim bynta shitrhem jong ki samla kiba mihkhmat na kumba ar spah sanphew tylli ki distrik jong ka ri.
Haba u la kren shaphang ka jingjop ban seng ïa ka rynsan ‘Mera Yuva Bharat – MY Bharat’ ha ki khyndiat snem mynshwa, u Myntri Rangbahduh u la ïaroh ïa ka jingpynïar kaba khraw jong ka ban kynthup ïa ki klur ngut ki nongshong shnong kiba dang samla.
Haba ai jingïaroh ïa ka kam kaba sngewtynnad bha kaba la pyntreikam da ki samla ha kylleng ka ri, u la kdew kyrpang ïa ki bor ba phylla jong ki kaba sdang naduh ka Viksit Bharat Dialogue haduh ka Viksit Vibrant Village Program. “Mynta, ki paralok samla jong ka MY Bharat ki leh ïa ki kam kiba kyrpang kiba dei ban ïaroh ha kylleng ka ri baroh kawei,” la ong u Modi.
Haba pynkynmaw ïa ka jingsdang jong ka sienjam ha ka por jong ka Viksit Bharat Young Leaders Dialogue, u Myntri Rangbahduh u la batai ïa ka jingthmu ban pynshlur ïa ki samla ban ym sahkut tang ha ki jingïakren lyngba ki lad online bad ban sngewthuh ïa ki jingshisha jong ka ri.
Haba batai bniah ïa ka jingthmu ban phah ïa ki samla nongshong shnong sha ki shnong khappud ha Himachal, Uttarakhand, bad Ladakh, u la ïathuh ba palat 400 ngut ki samla ki la shah jied na ki lai lak ngut ki nongïashim bynta ban sakhi dalade ïa ki kolshor jong ka thaiñ bad ban sakhi ïa ki jingangnud ieid jylliew kiba don ha kine ki thain.
“Ka jingpynïasoh ïa ka kolshor jong phi bad ka kolshor hangta ka long shisha ka nuksa kaba bha tam jong ka Ek Bharat, ka Shreshtha Bharat,” la bynrap u Modi.
Da kaba batai shaphang ki jingïadei kiba jylliew jong u bad ki nongshong shnong ha ki jaka khappud kiba la wan na ki jingleit jong u shwa ban shimti ïa ka kam sorkar, u Myntri Rangbahduh u la pynpaw ïa ka kam kaba neh ban rakhe ïa ka Diwali ryngkat bad ki shipai kiba don ha ki jaka khappud.
Da kaba pynïahap ïa ki jingshem shimet kiba phylla bad ki jingïathuh khana ba sngewtynnad ba la ïasam da ki samla kiba wanphai, naduh ka jingsakhi ïa ka jingieid ba khraw jong ka briew na kine ki thaiñ haduh ka jingshlur ba phylla jong ki shipai, u la ïaroh ruh ïa ki jingaiti ba khraw jong ki shipai ha ka sngi Kargil Vijay Diwas. “Ki riewshlur ki la pynher ïa ka lama jong ka jingjop hapoh ki jingeh kiba khraw, bad kane ka jingshem baroh kawei jong ka Viksit Vibrant Vilage ka la long kaba phylla shisha,” la ong u Modi.
Da kaba ong ba ki shnong kiba la kiew ki dei ki nongrim ba pura ban tei ïa ka Viksit Bharat, u Myntri Rangbahduh u la ban jur ha ka jinglong kaba ïai bteng jong kane ka jingïaid lynti sha ka jingkylla.
Da kaba ong ba ka jingïashim bynta, kaba naduh tynrai jong ki pateng kiba mynta kam pynïar tang ïa ka jingthmu jong ka ri hynrei ka pynskhem ruh ïa ka jingkut jingmut shimet jong ki ban noh synñiang sha ka jingkiew shaphrang jong ka ri, u Myntri Rangbahduh u la pynpaw ïa ka jingkongsan jong kane ka jingïadei. “Haba ki samla jong ka ri ki pynïadei bad ka kam, ki pynïar ïa ka jingthmu ba jylliew jong ka Viksit Bharat,” la ong u Modi.
Da kaba pdiang ïa ki jingeh kiba jur bha kiba don ha ka jingim ha ki thaiñ khappud, u Myntri Rangbahduh u la ïaroh ïa ki nongshong shnong ba ki im ha ka rukom kaba ieid ri man la ka khyllipmat wat hapdeng ki jingeh kiba ki don.
Haba pynrem ïa ka jingbym shimkhia jong ki Sorkar ba rim kiba la iehnoh ïa kine ki jaka kum ki ‘shnong ba khatduh’ ki bym don wat ïa ki jingdonkam kum ki surok, ka bording, bad ki hospital, u la pynpaw ïa ka jingsngew sarong kaba khraw ïa ka mynsiem ieid ri kaba ki nongshong shnong ki don.
“Ngi dei ban sngew sarong haduh katta katta ba wat hapoh kum kine ki jingeh kiba jur bha, ka jingieid ri jong ki briew ha ki shnong khappud kam shym la tlot satia,” la ong u Modi.
Haba batai bniah ïa ka jingkylla ha ka rukom treikam jong ka sorkar, u Myntri Rangbahduh u la kdew sha ka jingpynkylla thymmai ïa ki jaka shong jaka sah ha ki thaiñ khappud na ki ‘shnong ba khatduh’ sha ki ‘shnong ba nyngkong’ jong ka ri India, ha kaba ki rong jong ka lama jong ka ri ki paw nyngkong ha ka ri.
Haba kdew sha ki mawmer kiba bun kum ka jingwan nyngkong jong ka bording, ki surok, ka um kor, ki jingïoh gas, bad ka internet kaba bha tam, u la batai kumno kine ki jingdonkam ba kongsan ha ki jaka sor ki pynkylla ïa ka ïoh ka kot na ka rep ka riang bad ka jingim ba man la ka sngi jong ki nongshong shnong ha ki jaka khappud.
“Kane ka wan na ka jingpynkylla ïa kane ka rukom pyrkhat kaba la rim bha ba ki thaiñ khappud jong ngi ki nang kylla stet mynta,” la ong u Modi.
Haba batai shaphang ki jingmyntoi ha ka ïoh ka kot kiba nang kiew stet kiba la mih na ki jingdon jingem ba thymmai, u Myntri Rangbahduh u la kdew sha ka jingkiew biang jong ka kam jngohkai ha ki thaiñ.
Da kaba ong ba ki shnong kiba kynjah mynshuwa mynta ki long kiba bun ki kam ki jam, kiba wanrah ïa ki jinglong jingman kiba pynkupbor ïa ki khun kynthei jong ngi ha ka pule puthi bad ki lad kamai kiba khlaiñ ha kine ki jaka, u la ong ba kine ki jingkylla ki dei kiba la pynstet da ka Vibrant Village Program. “Ka Vibrant Village Program ka dang treikam bha ban ai bor thymmai kaba ïa kane ka roi ka par kaba pura jong ki shnong ha ki jaka khappud,” la ong u Modi.
Da kaba ong ïa ki jingleit sha ki jaka khappud ki dei ka jingïaid lynti kaba jylliew jong ka jingïatylli lyngba ka jingïashim bynta, u Myntri Rangbahduh u la pynkynmaw ïa ki samla kiba wanphai ba ki la ïoh ïa ka jinghikai kaba jylliew shaphang ka kolshor, ka jingsngewhun kaba jylliew, bad ka jingburom kaba khraw ban ïa kaba shu pdiang sngewbha.
Da kaba pynskhem ba kum kine ki jingïakynduh ba kordor ym lah ban ai satia ha ka kamra ïoh jinghikai, u la kyntu ïa ki nongïashim bynta ban pynshlur ïa ki paralok jong ki ban leit jngoh ïa kine ki thaiñ, kaba pynstet ïa ka jingpynpoi ïa ki jingdonkam katkum ka juk mynta. “Katba ki samla jong ka ri India ki nang sngewthuh jylliew ïa ki shnong ha ki jaka khappud, katta ka ri jong ngi kan nang khlaiñ,” la ong u Modi.
