Shillong, Naitung 27: Ka seng HANM jong ka West Jaiñtia Hills District ka la leit ban ïa kynduh ïa ka Branch Manager jong ka Punjab National Bank (PNB) ha Ummulong ban ai jingthoh ban kyntu ba kin buh ATM ha katei ka shnong.
Hapoh ka jingïalam jong u President ka seng u Bah T. Sutlong ki la leit ban ai da ka jingthoh sha ka Branch Manager jong ka Punjab National Bank ban kyntu ba don kam ban don ïa ka ATM Mashin ha Ummulong namar mynta ka don tang jong ka SBI.
Ka seng ka la ïoh ïa ka jingujor na ki paidbah ba, namar ka jingbym don ka ATM ka la buh ïa ki paidbah ha ka jingeh namar ki hap ban ap bun kynta namar ba la bun briew, dei halor kane ka daw ba ki kwah ban don ïa ka ATM Mashin jong ka PNB ha katei ka jaka.
Kane ka jingeh kam dei tang ïa ka shnong Ummulong hynrei ka dei ruh na ka bynta ki shnong sawdong kiba don hajan jong ka, ka seng ka ong ba kane ka dei ka jingangnud jong ki paidbah ka thaiñ, ka seng kan pynpaw ïa ka jingsngewnguh lada ka PBN kan buh noh ïa ka ATM ha Ummulong.
