Na ka jinghiar thma bad pynjot ki hati khlaw ha ka thaiñ Ranikor Civil Sub-Division

Mawkyrwat, Naitung 26: Haduh phra (8) tylli ki shnong kiba hap hapoh ka Ranikor Civil Sub-Division, South West Khasi Hills District ki la shah ktah jur na ka jingwan hiar thma bad shah pynjulor jong ki hati khlaw kaba la jia ha kine ki khyndiat taïew ba la leit noh.
Lah ban kdew ba katkum ka jingïoh lum jingtip napoh ka Wildlife Department, South West Khasi Hills District, la ong ba ki shnong kiba la shah ktah na ka jingwan hiar thma ki hati ki ki la kot haduh 8 tylli kata kiba kynthup ïa ka Shnong Panchiring, Rajaju, Munai, Largao, Myriaw, Kohtyllaw, Nongtre, bad Rajai.
Ym tangkata la ong ba, na ka jingwan hiar ki hati khlaw ka la wanrah ïa ka jingjulor ïa ki ïing briew bad ruh jaka jong ki nongrep, kynthup ïa ki jingthung jingtep, ki mar rep bapher bapher bad katto katne ki ïing ba sah briew. “Kane ka jingjia ka la pynlong ïa ki paidbah nongshong shnong ban don ha ka jingsyier mynsiem bad duh jingkyrmen namar ka jingma kaba lah ban mih na ka jingïakynduh bad kine ki hati khlaw”, ong ka kyrwoh.
Ha kawei pat ka bynta, ki bor ba dei peit lyngba ka tnad Wildlife hadien ba ki la ïoh ïa ka jingujor ne jingpyntip halor ka jingwan hiar thma ki Hati khlaw, na ka liang jong ki ruh kim shym la shongkli-kti hynrei ki la hiar ban jurip ban tip haduh katno ka jinglong jingman jong ki jaka, ki shnong ki thaw bad ki longïing na ka daw jong ka jingshah hiar thma ki hati. Kumta na kane ka jingleit jurip jong ki ki la lap ba haduh 8 tylli ki shnong ki la shah ktah bad halor kane ka bynta, na ka liang ki bor ba dei peit hapoh jong ka South West Khasi Hills District ruh mar mar ki la leh ïa kaba donkam bad phah ruh ïa ki jingthoh baroh ha ki bor ba haneng khnang ba kin ïoh leh ïa kaba donkam.
Ha kajuh por, ka tnad treikam jong ka Wildlife napoh ka South West Khasi Hills District ki la buh ka jingkyrpad ïa ki paidbah ba ki dei ban long kiba ïai shah bad long kiba kynthoh than namar kum ka ophis naduh ki jingjia kiba mynshwa ruh mar ïa ïoh jingtip halor ki jingshah hiar thma ha ki hati ki la pyndep ïa ki kam ram ban phah ruh ki kyrteng sha ki bor ba halor.
Na ka liang ka District Administration jong ka South West Khasi Hills District ruh ka kyntu ïa ki paidbah nongshong shnong kiba don ha kitei ki thaiñ ba kin long kiba husiar, ban kiar na ka jingleit tur hajan jong ki hati sha ki jaka khlaw ne ki jaka ba ju ïaid ki hati namar ïoh jia kiei kiei kiba sngewsih namar kumba ka long mynta ba ïa ki jaka ba ki hati ki ju pynlong jaka shong ruh la shah pynthut, ki jaka ba u ju pynlong jaka dih um ruh la pynthut kumta kine ki hati kim don shuh ki jaka ba paka ban rieh bad kim banse ban thaw ki lad ki lynti kiba long shngaiñ.