Lahduh ka Sunrays SS naki shynrang bad ka Synod HSS naki kynthei ha ka 32nd Inter School Karate

Shillong, Naitung 27: Ka Sunrays Secondary School ka la sei ïa ka jingïalehkai kaba kyrpang ban pyndep kum ka Overall Champion ne lahduh ha ka kyrdan ïalehkai ki khynnah shynrang ha ka 32nd Inter School Karate Tournament, kaba la pynkut ha ka sngi Saitjaiñ. ïa ka nam lahduh jong ki khynnah kynthei la ïohrah da ka Synod Higher Secondary School.
Ka Sunrays ka la ïoh ba kan khur haduh 18 tylli ki takma (8 tylli ki ksiar, 6 tylli rupa, 4 tylli rnong) ha ka liang ki khynnah shynrang katba ka Synod ka la khur 19 tylli ki takma (3 tylli ksiar, 6 tylli rupa, 10 tylli rnong) na ki kynthei.
Ka St Anthony’s HSS, kaba dei ka lahduh ha u snem ba la dep, ka la pyndep ha ka kyrdan ba-ar napdeng ki khynnah shynrang da kaba khur 22 tylli ki takma (5 tylli ki ksiar, 6 tylli ki rupa, 11 tylli ki rnong), katba ka Sacred Heart Girls HSS ka la wan ba-ar ha ka liang ki khynnah kynthei (3 tylli ki ksiar, 2 tylli ki rupa, 3 tylli ki rnong).
ïa kane ka lympung kaba lai sngi lynter la pynlong da ka All Meghalaya Karate-Do Association naduh ka 23 haduh ka 25 tarik Naitung, ryngkat ka jingkyrshan jong ka tnad Directorate of Sports and Youth Affairs ka Sorkar Meghalaya ha Multipurpose Indoor Hall ha SAI-NEHU, Shillong.
Ki don haduh 802 ngut ki nongïalehkai karate na ki 126 tylli ki skul kiba la soi kyrteng ban ïashim bynta ha kane ka lympung ba man la u snem na Khasi-Jaiñtia Hills bad Garo Hills naduh ka rta kaba 6 snem shaneng. Ki khynnah kynthei bad shynrang kiba la ïashim bynta ki long la jan mar katjuh – 391 bad 411 ngut, kaba pyni ïa ka jingsngewtynnat kaba nang kiew man ka por jong ka karate hapdeng ki samla ka jylla Meghalaya, bad khlem artatien ba katto katne na ki kin kiew shaphrang ban mihkhmat ïa ka jylla bad ka ri ha ki rynsan kiba kham heh.
Uwei na kum kine ki khlur ba dang kiew u dei u Daniel Dabiangbha Warjri, uba la khur takma ksiar ïa ka India ha ka 10th South Asian Karate Championship 2026 bad u la wanphai biang sha Shillong tang ha ka 21 tarik Naitung shuwa ba un khur ïa ka takma ksiar na ka bynta ka St Anthony’s HSS ha ka kyrdan Individual Kumite boys’ junior +61kg. Ma u lem bad u Gideon Tympuin, kiba la khur takma rnong ha ka U-21 kata jong ki shynrang (individual men’s U-21 kata) ha katei ka lympung South Asia, ki la shah pynkup burom da ka AMKA ha ka sngi sdang ïa ka lympung. U Gideon u dei uwei na ki nongpynïaid na ka bynta ki jingïalehkai hane ka inter-school tournament.
Ha ka sngi pynkut la sam ruh ïa ki khusnam shimet na ka bynta ki nongïalehkai ba kynsai lane ‘Best Karatekas’ ha ka kyrdan junior bad senior jong ki khynnah shynrang bad kynthei. ïa kine la khur da u Daaron R Warjri jong ka Christian Academy HSS (junior boys), u Pusaimi I Kyndiah jong ka Loompyrdi Iongpiah Upper Primary School, Jowai (senior boys), ka Emma T Kharwansuk jong ka Stonyland Secondary School (junior girls) bad ka Asenka Beryl Marwein jong ka St Joseph’s girls HSS (senior girls).
La plie ïa ka lympung da u Working President ka Meghalaya State Olympic Association bah John F Kharshiing kum u kongsan ha ka sngi Palei ha ka jingïadon lang u General Secretary ka MSOA bah Finely L Pariat kum y symbud kongsan. Ha ka sngi pynhap pyrda la wan kongsan da u Ivan Benson Diengdoh, Additional Superintendent of Police ka East Khasi Hills, ryngkat u Alan Niangti, President jong ka West Jaintia District Karate Association kum u symbud kongsan.