Shillong, Naitung 27: Ki samla na Mawsiatkhnam sa shisien ki la shongshit biang hadien ba u MLA barim Bah PT Sawkmie u la aiti ïa ki jersey bad kiwei ki tiar ïalehkai (sports) na ka bynta ka Inter Dong Football Tournament kaba ki thmu pynlong ha kine ki sngi ban sa wan.
Haba ai jingkren ha ka jingïalang balyngkot u Bah Sawkmie u la pynpaw ba u angnud ba ka Mawsiatkhnam kan ïa shimbynta ha ka lympung U20 Fourth Division jong ka Shillong Sports Association ba ju pynlong ha madan SSA Stadium, Polo.
U la pynpaw ruh ba lada wanphai biang ha ka bor kum u MLA ka thaiñ kan ym don jingeh ïa ka Mawsiatkhnam ba kan ïa shimbynta, namar u long ba la kloi ban mang pisa na ka bynta jong ka.
Ha kane ka sngi la ïoh ruh ïa ka jingkren na u Rangbah Shnong ka Mawsiatkhnam bah T. S. Wahlang, uba la pynpaw ba ha kine ki sngi ki la kynjah shisha ki jingïalehkai phutbol naduh bym long nongmih khmat shuh u bah PT Sawkmie.
“Ngim ju iohsngew shuh ïa ki jingput ki referee ha ka jingïalehkai, kaba ju pynshongshit ïa ki khun samla ba kin lait na ki jingmlien basniew,” ong u bah Wahlang.
La ïoh ruh ïa ka jingkren na ki nongïalam ka Sports Club, u samla B. Pyngrope bad samla H. L Mawphlang, kiba la ai khublei bad pynpaw ïa ka jingsngewnguh jong ki ïa u bah PT Sawkmie halor kane ka jingnohsynñiang jong u.
