U Myntri Rangbah ka ri, u dei ban pynïoh ïa ka hok jong ki samla pule NEET: JSM-CB

Khliehriat Naitung 26: Ka Jaiñtia Students Movement Central Body ka dawa ba u U Myntrirangbah ka ri, u Narendra Modi u dei ban pynïoh ïa ka hok jong ki samla pule Aspirant NEET ha kaba la dawa ruh ba ym dei shuh ban don ka jinglait tuh ki jingkylli, ym dei shuh ban don ka Jingthied bad Jingdie ïa ki Question Paper bad ruh ban buh ïa ki NEET Centre ha ri lum Jaintia bad ha baroh ki District Headquarters ha ka ri baroh kawei, khamtam ha Meghalaya.
Katkum u kyrwoh la ong ruh ba ka Jaiñtia Students’ Movement, Central Body (JSM-CB), ka pdiang sngewbha ïa ka jingkynthoh jong u myntri rangbah duh ka ri, u Narendra Modi, kumba la paw ha ki pathai khubor halor ka jingong ban jingpynshitom da kaba tyngeh ïa ki briew kiba donkti ha ka jingpynmih paidbah ne pyllait tuh ïa ki jingkylli ne NEET question paper bad ka jingpynneh ïa ka lawei jong ki samla pule ha ka ri, ka seng ka ong ba, tang ki kyntien kim biang, ka kam kaba shisha ka dei ban jia mynta.
“Hajar ngut ki samla pule na Meghalaya, khamtam na Jaiñtia Hills, ki la shah ktah na ki jingkynnoh halor ki jingbymbeit ha ka NEET UG 2026 ha baroh ka ri India bad na ka jingbym shimkhia kaba la slem ïa ka thaiñ jong ngi, kine ki jingeh ki pynpaw ruh ïa ki jingduna kiba khraw ha ka rukom treikam jong ka tnad pule puthi bad ka rukom pynlong eksamin jong ka ri, ki jingduna kiba lah ban ktah bad pynjot ïa ka lawei jong ki samla pule bad ha kaba kut, ïa ka lawei jong ka ri baroh kawei”
Na ka liang u President jong ka Jaiñtia Students’ Movement, Central Body, u bah Leningstar Rymbai,u la ong ba ka sorkar ka dei ban shimkhia mardor bad ban pynshitom tyngeh ïa kino kino kiba donkti ha ka jingpynmih paidbah ne pyllait tuh ïa ki jingkylli (question paper), ka jingpynbieit, ka jingpynkheiñ ïa ki kyndon ne ka jingthied bad jingdie ïa ki examination question papers bad bynrap ruh ba ka lawei jong ki samla pule kam dei ban long kaei kaei kaba lah ban thied bad die, namar u samla pule uba duk, uba pule shitom mynsngi bad miet, um dei ban shah pynbor ban ïakhun pyrshah ïa kiba lah ban ïoh jingmyntoi be-aiñ lyngba ka pisa, ka bor ne ki lynti be-aiñ. Lada u Myntri rangbahduh ka ri, u la kular ban shimkhia bad pynshitom tyngeh, te mynta ka ri ka khmih lynti ïa ki kam kiba shai bad kiba shisha.
Kumjuh ruh u Roitre Dkhar, uba dei u General Secretary jong ka Jaiñtia Students’ Movement, Central Body, u la dawa ïa ka jingtohkit kaba shai, kaba laitluid bad kaba don ïa ka por ba la buh, halor ki jingkynnoh halor ki jingbymbeit ha ka NEET UG 2026.
“Ka rukom pynlong eksamin ka dei ban long kaba shong nongrim ha ka jinglah, ka jingbeit bad ka jingshai. Lada ka jingtohkit ka pynshisha ba ka eksamin ka la shah pynsniew, ki bor ba dei peit ki dei ban shim ïa ki sienjam kiba donkam, kynthup ruh ïa ka jingpynlong eksamin thymmai lada ka long kaba donkam. Ka lawei jong ki samla pule kiba shisha bad kiba trei shitom kam dei ban shah pynjot namar ka jingbakla jong ka rukom treikam. Ka JSM-CB ka dawa ruh ïa ka jingpynïeng mardor ïa ka NEET examination centre kaba neh ha Jaintia Hills, kaba kham biang ban long ha Jowai ne Khliehriat, bad ka kyntu ïa ka Sorkar ban pynïeng ïa ki NEET centre ha baroh ki District Headquarters ha ka ri, khamtam ha Meghalaya” ong ki nongialam ka JSM.
“Ha kine ki por, ki samla pule na Jaiñtia Hills ki hap ban leit jngai ban ïashim bynta ha kawei na ki eksamin kaba kongsan tam ha ka jingim jong ki. Kane ka wanrah ïa ka jinglut kaba khia ïa ki longïing kiba duk bad ka pynmih ïa ka jingeh kaba khlem da donkam, ha ka met bad ha ka jingmut jingpyrkhat jong ki samla pule.
Kumjuh ruh u samla Heihokmi Supuh, Publicity Secretary jong ka Jaiñtia Students’ Movement, Central Body, u la ong ba ka jaka ba u briew u shong kam dei ban long ka jingeh ha ka jingïoh ïa ka pule puthi. Balei ba u samla pule na ka longïing kaba duk un hap ban pynlut ïa ki hajar tyngka tang ban leit sha kawei pat ka district ne sha kawei pat ka State ban ïashim bynta ha ka eksamin? Uwei pa uwei u samla pule u dei ban ïoh ïa ka jingïohlad kaba mar jingïaryngkat bad ka hok kaba mar jingïaryngkat.
Ka jingpynïeng ïa ki examination centre ha ki District Headquarters kam dei ka jingisynei ne ka jingai sngewbha, ka long ka jingdonkam kaba kongsan na bynta ka rukom pule puthi kaba hok bad kaba lah ban ïoh bynta da baroh.Ka JSM-CB ka ngeit skhem ba ym don uwei ruh u samla pule uba dei ban duh ïa ka lad namar ka jingduk, ka jingjngai ne ka jinglong jaka” ong u kyrwoh na ka seng bad shuh shuh ka JSM ka dawa ban don ka jingtohkit kaba kyrpang, kaba laitluid bad kaba don ïa ka por ba la buh halor ki jingkynnoh ïa ka NEET UG 2026 paper leak bad kiwei pat ki jingbymbeit, ban jingpynshitom tyngeh ïa baroh kiba donkti ha ka jingpynmih paidbah ïa ki question paper, ka malpractice, ne ka jingthied bad jingdie ïa ki examination question papers.
Ka seng ka dawa ruh ia ka jingpynlong ïa ka eksamin thymmai, lada ka jingtohkit ka pynshisha ba ka eksamin ka la shah pynsniew, khnang ban ïada ïa ki samla pule kiba shisha bad kiba dei hok, Ka jingpynïeng mardor ïa ka NEET examination centre ha Jaiñtia Hills, kaba kham biang ban long ha Jowai ne Khliehriat, Ka jingpynïeng ïa ki NEET examination centre ha baroh ki District Headquarters ha ka ri baroh kawei, khamtam ha Meghalaya, Ka rukom pynlong eksamin kaba shai, kaba hok bad kaba don ka jingkitkhlieh, kaba ïada ïa ka lawei jong ki samla pule.
“Ka lawei jong ki hajar ngut ki samla pule kam dei ban shah iehnoh ha ka kti jong ki paper leak, ka bamsap, ka malpractice, ka jingbymïaryngkat namar ka jinglong jaka ne ki jingbakla jong ka rukom treikam jong ka tnad pule puthi, ka JSM-CB kan ïai ïeng skhem ryngkat bad ka kynhun ki samla pule bad kan ïai pynmih ïa ka sur jong ka haduh ban da pynskhem ïa ka hok, ka jingshai bad ka jingïohlad kaba mar jingïaryngkat” pynkut u kyrwoh.