Lada ym map ka sorkar 850 klur tyngka ka khajna palat 3 lak ngut kiba im ja na ki trok ki la ïap thngan : Dy.CM

Shillong, Naitung 26 : U Symbud Myntri Rangbah ka jylla uba dei ruh u National Vice President ka NPP u Ma Sniawbhalang Dhar u la ong ba lada ka sorkar MDA kaba ïalam da ka NPP kam map ïa ka khajna haduh 850 klur tyngka lyngba ka skhim One Time Settlement (OTS) khlem pep kumba 3 lak ngut ki briew kiba im ja na ki trok ki la iap thngan ne ym lah shuh ban pyndap bam ha ki ïing ki sem jongki. Kumta u la kyntu ïa ki paidbah ka Jaintia Hills ban ai ka jingkyrshan ba pura ïa u kyrtong ka NPP ha kane ka election shiteng samoi sha ka Lok Sabha uba dei u Dr DRL Nonglait.
Haba kren na ka rynsan ïalap election na ka bynta u kyrtong MP ka Party NPP u Dr DRL Nonglait, u Ma Sniawbha u la ong kumba 1.70 lak tylli ki kali kim lah shuh ban siew ïa ka khajna hadien ka khlam COVID-19 bad kane ka la ktah naduh ba khang tih dewiong bad khang pom dieng ruh. Tang ka ram jongka Khajna na ki kali ka la kot 1050 klur tyngka. Hynrei ka sorkar MDA kaba sngewkhia ïa kane ka jingeh ki trai kali ka la shim rai ban map noh 80% ka khajna bad 90 % ka bai Fitness. Kumta na ka 1050 klur la map noh 850 klur tyngka. U la kyntu ïa ki trai kali ban siew noh ïa kaba sah shwa ka 31 tarik Nailar.
U la kyntait ïa ki jingkynnoh ba ka sorkar ka noh tang sha ki Kontraktor. U la ong “ Ngi dei ka sorkar kaba trei na ka bynta iwei pa iwei. Ka jingkiew jingbit jingbiang jong kiba duk dei ka jingbit jingbiang jong ka jylla” ong u ma Sniawbha bad u la pynkynmaw ruh ba ki dei ki Nongñiah trok kiba pyntyllun ïa ka ïoh ka kot ka jylla”.
U la kren ruh halor ki projek ki ban dang wan ha ka jylla ba kynthup ïa ka surok four-lane kaba 21 ,000 klur tyngka naduh Umroi haduh Ratacherra bad kane kan ïarap ban pynsuk ïa ka leit ka wan jong ki paidbah namar naduh Khliehriat haduh Guwahati kan ym shim por shuh haduh 7 kynta. U la ong ba ka jingpynpoi um sha ki ïing ha ki jaka sor ka la kiew na ka 7000 ha u 2018 sha ka 4 haduh 5 lak. La mang pisa ïa ki cllege ha Jaintia Hills bad na ka bynta ki SHG ruh la pyllait pisa haduh 600-700 klur tyngka.
U la ai k a jingïaroh ïa ka MLA ka kong Santa Mary Shylla kaba la uioh haduh 400 klur na ka bynta ka constituency bad u la ong ka Saipung ka dei ka jaka ba sahdien tam hynrei tang shu dep ka surok Sutnga phin sa ïohi ïa ka jingkiew ka roi ka par.
U kyntu bad kyrpad ïa ki paidbah ban ai ka jingkyrshan ba pura ïa u kyrtong MP Lok Sabha ka NPP u Dr DRL Nonglait khnang ba un jop don burom ha kane ka election shiteng samoi.