Pynsngewthuh ka Sohra ïa ki nongwan shangkai suwari ban ym bret jaboh pathar bad ban ym bam khana lynter ki surok

Shillong, Naitung 26 : Da ka jingnang tuid ki nongjngohkai sha Sohra, ki dkhot ka Hima Sohra Tourist Assistant Team ha ka sngi Saitjain, ki la ïa mih sha surok ban ïalap pynsngewthuh ia ki nongwan jngohkai ban ym pynjaboh ïa ka thaiñ kaba dei kawei na ki jaka jngohkai ba khring eh ïa ki nongshangkai.
Kane ka kynhun ka la sam ïa ki kot lyngkdop sha baroh ki nongwankai bad ki trai shnong, kaba kyrpad ïa ki ban kiar na kaba shet bam, bam jingbam harud surok bad bret ïa ki jaboh sharud shakiar hapoh ka thaiñ.
Ka kynhun kala buh ruh ïa ki kynhun ki ban ïaid pahara na ka bynta ban bthah ïa ki nongwankai kiba pynkheiñ ïa ki kyndon ba kin mih noh na ki jaka kiba la khang pyrshah.
Ka Sohra, kaba la pawnam na ka jingdon ki kshaid, ki jingkieng jri bad ki lum ba tap da u lyoh, ka dang ïai long kawei na ki jaka jngoh kai kaba khring tam ïa ki nongshangkai hapoh ka Jylla.
Kane ka jingïalap ka kwah ban pynthikna ba kane ka sor kan ïai neh ha ka jingdon ïa ka mariang kaba itynnad hapdeng ka jingnang bun ka jingwankai ki briew na kylleng sawdong.
Haba buh ïa ka jingkyntu, kane ka Tourist Assistant Team kala khot ïa ka jingïatreilang jong ki paidbah ban ïada ïa ka mariang.
“Ngi kyntu ïa baroh ba kin ïatreilang bad ka Hima Sohra Tourist Assistant Team da kaba kiar ban ïashet bam, ïabam jingbam harud surok bad ban bret jakhlia, khnang ban lah pynneh ïa ka jingitynnad jong ka Sohra” ong ka kynhun.
Lah ban kdew ba ka Hima Sohra bad ka Ophis u Deputy Commissioner ka East Khasi Hills, ki la pynmih teng ïa ka jingmaham ba khang pyrshah ïa ki nongjngohkai ba kin pynjakhlia ïa ka thaiñ Sohra.
Ka bor District kala maham ba kito kiba shem ba ki pynkhein ïa ki kyndon ban pynneh ïa ka jingkhuid, kin mad ia ka jingshah daiñ kuna ba kot 5,000 tyngka.
ïa kane ka jingïalap ban pynsngewthuh paidbah la ïalam da u President Alexon Diengdoh bad Secretary Pynlang Shangpliang jong ka Hima Sohra Tourist Assistant Team.