Yn pyntreikam pyrkhing ka Hima Mylliem ïa ka aiñ khang pyndonkam bad die plastik hapoh Ïewduh

Shillong, Naitung 26: Ka Hima Mylliem ka la pynpaw ba kan pynkhlaiñ ïa ka jingpyndonkam bad ka jingdie ïa ki plastic hapoh Ïewduh bad na ka liang ka Hima ka la ong ba kan pyntreikam pyrkhing bha ïa ka jingkhang ïa ka jingpyndonkam ïa ki pla plastic hapoh ïew.
Ïa kane la ïathuh da u Myntri uba khmih ïa ka Ïew u Myntri Baswel Shanpru haba kren sha ki lad pathai khubor ha ka sngi saitjaiñ ha ka jingleit jurip jong u Acting Syiem ka Hima Mylliem u Paiem Alban Fredrick Syiem ha ryngkat ka jingdonlang ki Myntri ki Basan bad kiwei kiwei.
Halor kane u Myntri Shanpru u la kyntu ïa ki nongdie dukan kiba don ha Ïewduh ba kin ïatreilang bad ki bor jong ka Hima Mylliem halor kane ka kam.
“Lada ngi lap ïa kino kino kiba pynkheiñ ïa kane ka hukum ngin pynshitom ïa ki katkum ki kyndon jong ka aiñ,” u la bynrap.
U Myntri Shanpru u la bynrap shuh shuh da kaba ong ba lada lah ban khang ïa ka jingpyndonkam ïa ki plastic kan pynthikna ba ka don ka jingkhuid jingsuba hapoh ka Ïew.
Na ka liang u Myntri u la ïathuh ba u Syiem ka Hima Mylliem un sa phah ïa ki nongkhmih bad ki nongtrei ka ïew ban pynthikna ba ki dukan kim dei ban pyndonkam bad die ïa ki plastic ba la khang katkum ka aiñ.
Lah ban ong ba u Acting Syiem ka Hima Mylliem, Alban Fredrick Syiem ha ka sngi saitjaiñ u la jurip ïa ka Ïewduh ban sngap ïa ki jingud jingnam jong kiba die jingdie kiba don ha kane ka ïew kaba heh duh ka jylla.
Ïa u Acting Syiem la synran lang da u Basan Nongkseh Bah Nathan Thangkhiew, ki Myntri ba kynthup ïa u Bah Iaineh Nongkhlaw, Baswel Shanpru bad kiwei kiwei.
Ha ka jingjurip u Paiem u la ïohi da la ki jong ki khmat ïa ka jingkhapngiah, ka jingjaboh bad ong ruh ba u shem ba ka Ïewduh manla ka por kadei ka jaka ba ju pyndonkam da ki briew kiba kyrni ha ka dih drok hadien ba u la lap ïa ka jingdon ki syringe ha ba bun ki jaka.
“Ngi la ïoh ki jingujor ba ka don ka jingsma iwtung kaba jur bha ha kiba bun ki basa jong ka ïew,” bynrap u Acting Syiem.
Halor ka jingkhapngiah u Basan Nongkseh u la ïathuh ba ka sorkar jylla ka la tyrwa ban tei ïa ka G+5 ka jingtei hapoh ïewdie lang ha kaba ïa kane haduh mynta dang lah ban tei tang shi mala.
“Ngi khmih lynti ba ka sorkar jylla kan pynïoh jingïarap pisa ban lah tei pyndep ïa ka building. Lada ngi lah ban tei sa 5 mala tam ngi kyrmen ba kan sa pynduna ïa ka jingkhapngiah hapoh ka Ïew,” ong u Basan Nongkseh.
U la ïathuh ba ka ophis ka Hima Mylliem ka la ïohpdiang bun ki jingujor na ki paidbah kumjuh ruh na kiba shong dukan halor ki jingduna kiba bun hapoh Ïewduh kum ka jingsma, ka jingjaboh bad kiwei, da kaba bynrap ba ka Hima kan leh katba lah ban pynduna ïa kane ka jingeh bad kyntu ruh ïa ka sorkar ban pynsted ïa ka jingmang pisa halor kane ka bynta.
U Bah Thangkhiew u la pyntip ba ka ophis Syiem Hima Mylliem ka don kumba 47 ngut ki nongpynkhuid kiba pynkhuid ïa ka ïew manla ka sngi bad na ka daw bym don ka jaka buh ïa ki jhur ki la pyut bad la shu bret kat shaba lap ba shem da ki nongdie bad kiba pynpoi mar, namar ha ka por ba ki kit, ki mar, khamtam ki mar pyut ki hap noh ha lynti bad ki la kylla pyut bad kane ka lam sha ka jingsma bad jakhlia ki katto katne ki basa.
“Na ka liang jong ngi, ngi la tyrwa ïa ka jingtei kaba 5 mala tam kaba don bad ka kamra dait thah ban buh ïa ki mar rep kiba pyut, kum ki jhur,” ong u Basan Nongkseh.
Ha kawei ka liang u Myntri Nongkhlaw u la ong ba u Syiem bad ka Dorbar Hima Mylliem ki kyntu ïa kiba shong dukan bym dei ban kyntur sha ki lynti ïaid ki paidbah khnang ban lait na ka jingkhapngiah.
U Myntri u la ong ba ki nongtrei ka Hima Mylliem kiba la tip bniah ïa ka aiñ bad ka hukum la ai ka kamram ba kin pynpra ïa ki jingtei kiba kyntur sha ki jaka paidbah.
U la kyntu ruh ïa kiba die madan ba kin treilang bad ki nongpynkhuid ïew ka Hima Mylliem da kaba buh ïa ki jhur ba la pyut hapoh ki byrni ban khuid ka ïew.
U Myntri Nongkhlaw u la kyntu ruh ïa kito kiba shim wai ïa ki paiñkhana hapoh Ïewduh ba kin leh khuid bad pynneh ïa ka jingkhuid jingsuba ha kine ki jaka leitbar paidbah.