Ïakynduh u ma Sniawbhalang Dhar ïa ki Niamtre Raid Nongjngi ban pan jingkyrshan ïa u Dr. D.R.L. Nonglait

Jowai, Naitung 26: Kum shi bynta jong ka jingïalap MP By-Election, u Symbud Myntri Rangbah ka Jylla ma Sniawbhalang Dhar ha ka sngi Thohdieng u la ïakynduh ïa ki nongïalam bad ki dkhot jong ka Niamtre Raid Nongjngi ban pan ïa ka jingkyrshan na ka bynta u kyrtong ka NPP, Dr. DRL Nonglait.
Haba kren ha ka jingïalang u ma Dhar u la ban jur ba kane ka ilekshon ka dei ka kabu ban pynkhlaiñ ïa ka jingïatylli, ka shongsuk bad ka roi ka par jong ka Meghalaya. U la kyntu ïa ki paidbah ban ïeng lang khlem da pynïakhlad bad ban jied ïa u nongïalam uba lah ban rah ïa ka sur jong ka jylla sha Parliament.
U la ong ba ka Meghalaya ka don ka bor bad ka lad ban kiew hynrei ka donkam ïa ka jingïatylli hapdeng ki paidbah, ki shnong, ki jaitbynriew bad ki ñiam bapher bapher. “Haba ngi ïeng lang kum kawei ka jylla, ym don kano kano ka jingeh kaba ngim lah ban pynjop. Ka jingïatylli ka long u nongrim jong ka roi ka par bad ka jingshngaiñ jong ki paidbah,” la ong u ma Dhar.
Ha ka jingkren jong u ma Sniawbha u la ai khublei ïa ka Niamtre Raid Nongjngi bad u la kular ban trei da ka jingkitkhlieh na ka bynta ka jingmyntoi jong ki paidbah bad ka bha ka miat jong ka jylla hi baroh kawei.