Shyrkhei ka jingshah ktah ki paidbah na ka jingshlei um bad twa khyndew

Nongpoh, Naitung 26: ka jingther u lapbah ha kine ki khyndiat sngi bala leit kala wanrah ka jingjulor kaba khraw bad ka jingshah ktah jong bun ki longiing naka jingshlei um bad ka kumjuh ruh ka jingtwa khyndew ha kaba palat 21 tylli ki shnong hak thaiñ Ri-Bhoi kila shah ktah ha kane ka jinglynshop ka bor mariang.
Halor jong kane ka jingshah ktah ki longiing longsem naka jingshlei um bad twa khyndew naka liang ka HYC haka sngi thohdieng kala aiti da ka jingthoh sha u Deputy Commissioner ka Ri-Bhoi District ban pynsngew ïaka jingeh jong ki paidbah nongshong shnong bad khamtam ba ka sorkar ka dei ban shimkhia mardor ban pynïoh ki lad jingïarap kiba kyrkieh sha kitei ki longiing kiba la shah ktah.
Haba kren sha ki lad pathai khubor hadien ka jingïakynduh naka liang u Bah Tony Shylla Assistant Public Secretary ka HYC sengkmie haka jingdonlang u Bah RC Thangkhiew Sports Secretary ka sengkmie u la ong ba kum ka seng ka dap da ka jingsngewkhia halor katei ka jingshah ktah bun ki longiing longsem naka jingshlei um bad ka jingtwa khyndew nalor ki jingthung jingtep, bad kum ka seng kala buh ka jingkyrpad sha ka sorkar ba kan shimkhia ban pynïoh ki lad jingïarap sha kitei ki lanot.
Shuh shuh ka seng kala pynpaw ruh ba kadaw ba kongsan hi jong ka jingshlei um ka dei namar ka jingbym biang ki nala tuid um ha kaba ka um kam don lynti ba biang ban ïaid sha ka jaka ba dei ban ïaid bad kum ka seng kala dawa ruh ba dei ban pynheh biang ïaki nala tuid um ha shilynter u surok National Highway, ban pynkhuid ruh ïaki nala man ka por namar ka jingset jaboh bad kumjuh ruh ka ktieh ka pynlong ïaka um ban nym ïoh jaka ban tuid sha ka jaka ba dei ban tuid.