Shillong, Naitung 26: Ka State Disaster Response Force (SDRF), Meghalaya, ka la pynkut ïa ka jingwad bniah hadien ba la ioh sei ïa ka metïap jong u briew uba la jah rngai na ka wah Wahniangleng hajan Phra Mer, Mylliem, ha ka por kumba 7:10 baje mynstep jong ka 26 Kyllalyngkot 2026.
Ïa kane ka jingwad bniah la sdang naduh ka 22 tarik u Naitung 2026 hadien ba la ïoh jingtip ha kaba ïadei bad ka jingjah jong uwei u nongshong shnong ka Phra Mer, Mylliem.
Ki kynhun jong ka SDRF, ha ka jingïatreilang bad ki Pulit jong ka Mawngap bad ki nongshong shnong jong ka Laitkroh bad Phra Mer, ki la pynlong ïa ka jingwad kaba jur ha ki jaka thliew bad harud ka Wah Wahniangleng, kynthup ïa ka jingpyndonkam da ka Rubber Inflatable Boat (RIB) ban tap ïa ka wah na Dam Mawphlang.
Ha ka 23 bad 24 tarik Naitung 2026, la pynlong ïa ka jingwad kaba jur bha naduh ka Dam Mawphlang shaduh ka Wah Wahniangleng da kaba pyndonkam ïa ka Rubber Inflatable Boat (RIB), kaba kynthup ïa baroh ar ki bynta sharum bad shaneng.Hynrei ym shym la lap satia ïa ka dak jong utei u briew uba la jah.
Ha ka 25 tarik u Naitung 2026, ki nongshong shnong ki la lap ïa ka met ïap ha ka bynta ba la khang jong ka wah.Ki briew jong ka SDRF ki la sdang mardor ïa ki jingpyrshang ban sei, hynrei la hap ban pynsangeh noh ïa ka jingtrei namar ka jingkhlain bor jong ka um bad ki jinglong jingman kiba shyrkhei.
Ka jingwad ka la sdang biang ha ka step jong ka 26 tarik u Naitung 2026, bad ha ka por kumba 7:10 baje mynstep, ka kynhun jong ka SDRF ka la lah ban sei ïa ka met iap.Hadien kane la aiti noh sha ki pulit ka Mawngap ban pyndep ïa ki jingdonkam katkum ka ain.
