Mawkyrwat, Naitung 23: Ka Nonglang Sports Club ka la pynkut noh ïa ka lympung jingïalehkai Football Inter-Dong 2025–26 jong ki Rangbah kiba la palat 30 snem ba la pynlong ha Madan Pyndenïewlyngdoh, Nonglang ha kaba ka Dong Nongdom ka la long ka nongjop.
Ha ka jingïakhun phainal, ka Dong Mawphorkynbat ka la ïakynduh ïa ka Dong Nongdom ha ka jingïalehkai ka la long kaba itynnad bad kaba shongshit bha naduh kaba sdang. Ka Dong Nongdom ka la ïoh ban thep ïa ka bol ba nyngkong lyngba ka penalty kaba la kynjat da u George Franky Snaitang ha ka minit kaba 18, bad haduh kaba kut jong ka kyllastep ka Dong Nongdom ka la tam da 1 – 0 pyrshah ïa ka Dong Mawphorkynbat.
Haba wan phai biang ha ka kyllamiet, ka jingïalehkai ka la nang khamitynnad namar baroh ar tylli ki dong ki la ïakhun tyngeh ban ïoh rah ïa ka nam jingjop, kumta ka Dong Nongdom ka la pynkhlaiñ ïa ka jong ka kynhun da kaba thep sa lai tylli ki kol lyngba u George Franky Snaitang ha ki minit ba 46, 50 bad 58. Hynrei watla kata ruh, ka Dong Mawphorkynbat kam shym la kynran dien, pynban ka la ïa ksait ban pynphai shi kol lyngba ka penalty kaba la shut da u Filterman Rmiat ha ka minit kaba 64.
Kumta, haduh kaba kut jong ka jingïalehkai jong ka regular time, ka Dong Nongdom ka la jop da 4 – 1 kol bad rah syndon ïa ka nam lahduh jong kane ka lympung pyrshah ïa ka Dong Mawphorkynbat.
Ha ka jingsam ïa ki khusnam, ïa ka nam ‘rangïalehkai ba tbit la ïoh rah da u Pyrkhatbha Shangdiar (Nongdom), katba ïa ka nam kum u ‘rang bat bit ha ka jingkyrda la ïoh da u Mishel Wanniang (Mawphorkynbat). Ïa ka nam nongthep bun kol la ïoh rah da u George Franky Snaitang (Nongdom), ïa ka nam nongaop kol ba tbit la ïoh da u Walterjune Kharlyngdoh (Nongdom), bad ïa ka nam ‘rangïalehkai ba tbit jong ka jingïakhun phainal la ïoh rah da u Maxwellpaul Snaitang (Nongdom).
Ïa ka jingïalang khang pyrda la wan ïashimbynta u Bah S.K. Budnah, u riew rangbah na ka shnong Mawlangwir, South West Khasi Hills District, kum u Kongsan ha ryngkat ka jingdonlang ruh u Bah Firsterlin Kharraswai, Myntri Shnong Nonglang, u Bah Syntarlin Snaitang, President ka Nonglang Sports Club, u Bah Kordorlyne Kharlyngdoh, Secretary ka Nonglang Sports Club, ryngkat bad kiwei pat ki rangbah shnong, ki nongkitkam bad ki samla shnong kiba la wan ban sakhi ïa kane ka sngi pynkut jong ka lympung jingïalehkai.
