Sdang ka AMKA ïa ka 32nd State Level Inter School Karate Tournament 2026
Poi palat 800 ngut ki khynnah ïalehkai ban ïashim bynta naki 126 tylli ki skul.
Shillong, Naitung 23: Ka lympung ïalehkai karate ki skul ba la tip ïa ka kum ka ‘32nd State Level Inter School Karate Tournament 2026’, ka la sdang naduh hynne ka sngi Palei ka 23 tarik u Naitung ha Multi Purpose Indoor Hall, ka SAI, STC, NEHU, Shillong.
ïa kane ka lympung kaba lai sngi lynter la pynlong da ka All Meghalaya Karate Do Association (AMKA), ryngkat ka jingkyrshan jong ka Directorate of Sports and Youth Affairs ka sorkar Meghalaya.
Ka sienjam kaba 32 jong kane ka lympung ka la sakhi ïa ka jingïashim bynta haduh 126 tylli ki skul bad ki khynnah kiba ïalehkai ki la kynjoh sha ka 802 ngut kynthei bad shynrang.
Ha u snem ba ladep ki nongïashim bynta ki don haduh 748 ngut naki 104 tylli ki skul. Ka St Anthony’s Higher Secondary School kadei kaba bat ïa ka nam lahduh ha ka liang jong ki shynrang bad ka Auxilium Girls’ Higher Secondary School kadei kaba bat ïa ka namlahduh ha ka kyrdan jong ki kynthei.
La wan kongsan ha ka jingïalang plie pyrda da u Working President ka Meghalaya State Olympic Association (MSOA) bah John F Kharshiing, ha ka jingïadon lang u General Secretary ka MSOA bah Finely L Pariat kum u symbud kongsan, u Jt Secretary MSOA bah P.Laloo lem bad kiwei kiwei ki riew pawkhmat bad kumjuh ki nongïalam bad ki nongkit kam jong ka AMKA.
Ha ka jingïalang plie, ka la don ruh ka jingpynkup burrom ïa ki arngut ki khlur ïalehkai kiba dang ha ka taïew kaba la dep ki la lah ban khur ïa ka takma ksiar bad takma rnong na ka rynsan ïalehkai jong ka 10th Cadet Junior, U-21 & Senior South Asian Karate Championship 2026 ba la long ha nongbah Dhaka, Bangladesh naduh ka 15-19 tarik mynta u bnai Naitung.
Kine ki arngut ba la shah pynkup burom ki long u Daniel Dabiangbha Warjri ba la khur ïa ka takma ksiar na ka Boy’s Junior-68 KG bad u Gideon Tympuin ba la khur ïa ka takma rnong na ka Men U-21 Indiviadual Kata.
Haba ïadei bad kane, na ka liang u bah Finely u la pynbna ruh ïa I song khusnam pisa ba long mar 5 hajar tyngka lyngba ka MSOA sha kine ki arngut ki khlur ïalehkai karate jong ka AMKA.
Ha shwa ban sdang shakhmat ïa ki jingiakhun baroh, ka la don ka jingpule ïa ka kyntien bam smai ba la lam khmat da u Daniel Dabiangbha Warjri bad hadien kane u kongsan u la shim pat ïa ka bynta ban pynbna ïa ka jingplie ïa ka pyrda na ka bynta kane ka jingïakob.