Tura, Naitung 19: Ka Special Intensive Revision (SIR) ïa ki thup kyrteng thep vote ha Meghalaya’s West Garo Hills ka la rung sha ka bynta kaba khatduh, ha kaba ki ophisar ka tnad elekshon ki la sam palat 98 percent ïa ki enumeration forms sha ki nongthep vote ha kylleng ka district.
Katkum ka jingïathuh jong u District Election Officer, la sam haduh 391,571 tylli ki enumeration forms na ki 396,914 ngut ki nong thep vote ha ki 11 tylli ki Assembly constituencies jong ka District haduh ka por 4 baje janmiet jong ka sngi Saitjaiñ, katba 235,420 tylli ki phorm la dep ban pynkylla digital.
Ka Enumeration Phase jong ka Special Intensive Revision ka la sdang ha ka 30 tarik u Jylliew ha baroh ki 547 tylli ki bynta thep vote ha ka distrik, ha kaba ki heh ki la ai jingtip ïa ka jingïaid beit bad ka jingïashim bynta kaba radbah na ki nongthep vote.
Napdeng ki constituency, ka Rangsakona bad Dadenggre ki la ioh pdiang ïa ka jingsam ba 100 percent, katba ka Raksamgre, Tikrikilla, Rajabala bad Dalu ruh ki la ioh ïa ka jingpynbiang kaba pura.Ka North Tura bad ka South Tura ki dei napdeng ki constituency ha kaba ka jingsam ka dang ïaid shakhmat.
Ka bor pyniaid district ki la ong ruh ba ka SIR helpline ka la ïoh 25 tylli ki call, baroh la pynbeit, kaba pyni ba ïa ki jingeh kiba ïadei bad ki nongthep vote la pynbeit kloi ha ka por ba pynkylla.
Ki heh ophisar jong ka tnad elekshon ki la kyrpad ïa ki nong thep vote kiba dang sah ba kin pyndep kloi ïa ka jingkhein kyrteng khnang ban pynthikna ba ïa ki thup kyrteng jong ki nongthep vote yn pynthymmai shwa ka elekshon ban wan.
