La pynskhem pura ïa ki nongkitkam ka Synjuk Ki Rangbah Shnong Ri-Bhoi Mihngi

Nongpoh, Naitung 12: Ka Synjuk Ki Rangbah Shnong Ri-Bhoi Mihngi mynta ka sngi ka la pynlong ïa ka jingïalang ban pynskhem ïa ki nongkitkam ba pura jong ka Synjuk kaba kdup ïa ki Rangbah Shnong na ki shnong bapher bapher jong ka thaiñ Ri-Bhoi Mihngi, naduh Umïam haduh ki shnong khappud jong ka Block-II. La seng ïa kane ka Synjuk ban pynkhlaiñ ïa ka jingïatylli hapdeng ki Rangbah Shnong bad ban trei lang na ka bynta ka bha ka miat jong ki shnong ki thaw.
Ka thong jong ka Synjuk ka long ban pynneh bad pynsah ïa ka riti ka dustur, ban pynskhem ïa ka rukom synshar shnong bad ban peitngor ïa ki kam kiba ktah ïa ka suk ka saiñ jong ki shnong. Ka Synjuk kan trei ruh ban ïakhun pyrshah ïa ka jingkhaïi kyiad be-aiñ, u drok bad kiwei kiwei ki kam sniew kiba nang kynrei ha ki shnong ki thaw. Nalor kata, kan buddien ruh ïa ki skhim bad ki kam pynroi bapher bapher jong ka sorkar khnang ba ki shnong kin ïoh ïa ka hok bad ka jingmyntoi kaba dei hok ïa ki.
Ïa ka Synjuk yn ïalam da u Bah P.B. Sylliang kum u Chairman, Bah Pher Teron kum u Vice Chairman, Bah Ailongbha Pariat kum u Secretary, Bah Nicholas Malai kum u Assistant Secretary, Bah S. Thankhiew kum u Finance Secretary, Bah T. Biam kum u Treasurer, Bah K. Laloo kum u Adviser, ryngkat bad 15 ngut ki dkhot. Ïa ki nongkitkam la pynskhem da u Chairman ka Synjuk ki Rangbah Shnong Ri-Bhoi District, u Bah B.B. Makdoh.
Haba kren ha ka jingïalang, u Bah B.B. Makdoh u la ong ba ka Ri-Bhoi ka donkam ïa ki Rangbah Shnong kiba don ka mynsiem shynrang ban ïalam bad kiba kloi ban ïada ïa ka bor bad ka kyrdan jong ki Dorbar Shnong. U la ïaroh ïa ka jingïatylli jong ki Rangbah Shnong ha ka District bad kitbok kitrwiang ïa ki nongkitkam ba thymmai ba kin trei hok, trei shitom bad ïalam ïa ka Synjuk sha ka lynti kaba bha.
Ha kajuh ka por, u Bah B.B. Makdoh bad u Bah P.B. Sylliang ki la pynpaw ïa ka jingsngewkhia halor ka Bill ba dang shu wanrah da ka District Council, kaba kdew ba ki Rangbah Shnong kin ym don bynta shuh ha ka thoh jaka. Ki la ong ba lada pyntreikam ïa katei ka Bill, kan pynduna ïa ka bor bad ka bynta jong ki Rangbah Shnong.
Kitei ki nongïalam ki la kyntu ïa baroh ki Rangbah Shnong ha Ri-Bhoi ba kin ïatylli bad ieng skhem ban pyrshah ïa kano kano ka aiñ ne ka rai kaba lah ban pynduh ne pynduna ïa ka bor bad ka hok jong ki Dorbar Shnong bad ki Rangbah Shnong.