Shillong, Naitung 12 : Ka Sorkar jylla ka don ka jingthmu ban pynheh bad kyntiew kyrdan noh ïa ka Baljek Airport kaba don hajan Tura khnang ban plie lad ïa ki liengsuiñ ba mih na katei ka kad ban leit sha kiwei ki nongbah jong ka Ri kum sha Kolkata bad Delhi, la ong u Myntri ka tnad Tourism ka sorkar Jylla, Timothy D. Shira.
Haba kren bad ki lad pathai khubor, u Myntri u la ïathuh ba kane ka jingpynheh ïa ka Baljek Airport kan ai jingmyntoi ym tang ïa ka kam jngohkai pyrthei hynrei ruh ïa ki nongshong shnong ka thaiñ Garo Hills.
“Ngi kwah ba ki liengsuiñ kin mih na Baljek ban leit sha ki shnongbah bapher bapher jong ka Ri,” u la ong.
Shuh shuh u la ïathuh ba haduh mynta hi, ki paidbah lada ki mut ban leit sha Delhi ki hap ban leit lyngba ka kad liengsuin Guwahati kaba la ktah ïa ka por bad ka jinglut jingsep.
“Lada ngi don ka leit ka wan lyngba ka liengsuiñ na Baljek Airport, ka jinglut kan duna bad ngin poi sha ka jaka ba ngi thmu ha ka por kaba lyngkot,” u la ong.
Katkum ka jingïathuh jong u, ka jingpynheh ïa ka Baljek Airport kan pynbha ïa ka jingïasoh jong ka leit ka wan lyngba ki liengsuiñ ha ka thaiñ bad kan pynsuk ïa ka jingleit jingïawan jong ki paidbah ha ka thaiñ phang sepngi jong ka jylla khamtam ha Garo Hills.
