Sdang shongshit ka elekshon MP, da ki spah ngut poi ki nongkyrshan Congress sha ka NPP Mairang

Shillong, Naitung 12 : Kum shi bynta ka jingpynkhreh ïa ka elekshon MP shiteng samoi ha Shillong Parliamentary Constituency, ka National People’s Party ha ka sngi Saitjain ka la pdiang burom da ki spah ngut ki nongkyrshan jong ka Congress na Mairang kum ka dak ban pynpaw ïa ka jingkyrshan kaba pura ïa u kyrtong ka party, Dr DRL Nonglait.
Ka jingpdiang ïa kine ki dkhot thymmai ka la long ha ka jingïalang paidbah ba la pynlong da ka NPP ha Mairang. Ïa kane ka kynhun la ïalam da u Bah R Nongseij, President ka Mairang Block Congress Committee.
Haba kren ha katei ka jingïalang, ki nongwan pynïasoh thymmai ki la ong ba ki la rai ban mih noh na ka Congress ban ai ka jingkyrshan kaba pura ïa u Dr DRL Nonglait ha ka elekshon shiteng samoi sha ka Shillong Parliamentary seat, kaba la khmih lynti ba ka Election Commission kan sa pynbna shen.
Ki nongïalam ka NPP kiba la don ha katei ka jingïalang ki la ong ba ki paidbah mynta ki kwah ïa ka sorkar kaba skhem bad kaba ïaid ryngkat bad ka roi ka par.
“Ki paidbah ki la sngewthuh ba ka jylla ka donkam ïa ka sorkar kaba trei ryngkat bad ki projek kam pynroi ban kyntiew ïa ka Meghalaya,” la ong uwei na ki nongïalam ka NPP.
“Ki paidbah mynta ki la sngewthuh ba kim dei ban shah ïalam bakla. Pynban, ki dei ban ïatylli bad buh ïa ka jingshaniah ha ka NPP, kaba la wanrah shibun ki projek pynroi bad ki jingkylla ha ka jylla,” ki la ong.
Katba ka ilekshon shiteng samoi ka dang jan, ki nongïalam ka party ki la ong ba u Dr DRL Nonglait u dang ïoh ïa ka jingkyrshan kaba nang jur na ki paidbah ha kylleng ka Khasi bad Jaintia Hills.