Dang sawa tang 3 tylli ki party ban ïakhun ïa ka election 2023 na Nongpoh Constituency

0

Nongpoh, Naitung 21: Ka jingïakren halor ka election 2023 na Nongpoh Constituency ka la dang sawa jur bha ha Nongpoh Constituency kaba dei ruh ka Head Quarter jong ka Ri Bhoi District bad kumba long haduh kine ki sngi wat la ka jingïakren shaphang ka Election 2024 ka la sawa jur bad dang don pat tang 3 tylli ki party kiba thmu ban pynieng kyrtong na kane ka Constituency.

Kum ban pynkynmaw, kane ka Nongpoh Constituency ka dei ka Constituency kaba la long nongmihkhmat da u Dr. D.D Lapang la bun phew snem bad dei hadien ba la shongthaid noh u Dr. D.D Lapang la wan mih plie noh u Bah Mayral Born Syiem kum u MLA kane ka Constituency bad lah ruh ban ong ba u la ioh ruh ka jingkyrkhu na u Dr. D.D Lapang haduh ba ki paidbah ki la jied mih plie ïa u Bah Mayral Born Syiem hadien ba u Dr. D.D Lapang u la shongthaid noh na kane ka kam saiñ Hima Sima.

Ha kane ka kynti jong u snem 2023, ka long kaba kham eh ban batai ïano ki paidbah kin pynjop na kane ka Constituency, bad ka daw ka long ba tang hadien ba u Bah Mayral Born Syiem u la jop kum u MLA ka Congress, u Dr. D.D Lapang u la phet seng noh sha ka party NPP bad ha kane ka kynti ruh kumba paw ka long ba wat u Bah Mayral Born Syiem ruh ym thikna shuh ba un dang ïa khun na ka party congress kaba u la jop ha u snem 2019 kaba dei hadien ba la mih ka kynrum ka kynram hapoh ka party Congress.

Haba kren halor kane ka election 2023 na Nongpoh Constiteuncy, ki party kiba la paw bad kiba la thikna ban buh ïa ki kyrtong ki kynthup ïa ka party Congress ha kaba la paw ka kyrteng jong ka Kong Rona Khymdeit, kaba dei ka MDC barim ka Nongpoh, na ka party NPP la paw ka kyrteng ka Kong Macdalyne Mawlong, MDC ka Umsning bad wat la u Bah Myaral Born Syiem um pat pynpaw pyrthei la sawa ka jingïakren bad ha kane ka kynti un ïa khun na ka party UDP.

Kiwei kiwei ki party kim pat paw pyrthei ha Nongpoh Constituency lait noh kitei ki lai tylli ki party kiba la kham paw bad ym lah ruh ban ïa kren halor kane ka election 2023 ha kaba ha kane ka kynti ka jingïakhun ïa ka election ka lah ban long kaba kham pher na ki snem ba la leit noh.

Leave A Reply

Your email address will not be published.