Pynsangeh ka KSU ïa ka jingtei Food Court ha Umling, dawa ban pyndep shwa ïa ka Facilitation Centre

Nongpoh, Jylliew 30: Ka Khasi Students’ Union (KSU) Central Executive Council ryngkat bad ka KSU North Khasi Hills District Unit, mynta ka sngi, ki la leit ban pynsangeh ïa ka jingtei ïa ka Food Court ha Umling, da kaba pynpaw ïa ka jingpyrshah jur ba la pyndonkam ïa ka jaka kaba la thmu ban tei ïa ka Facilitation Centre ban pynlong pynban kum ka Food Court ne ka jaka ba don ki dukan bam.
Shuwa ban hiar sha katei ka jaka, ki nongïalam ka KSU hapoh ka jingïalam u Vice-President ka KSU Central Executive Council, u Samla Pynkmen Sanmiet bad la synran lang da u President ka KSU North Khasi Hills District Unit, u Samla Ferdynald Kharkamni, u Sports Secretary ka KSU Seng Kmie, u Samla Erick Nongkynrieh, u General Secretary ka KSU North Khasi Hills District Unit, u Samla James Hitler Mawphniang, lem bad kiwei pat ki dkhot ki la ïakynduh shwa ïa u Tourist Officer ka Ri Bhoi, u Bah Bansynshar Nongkynrih, ban pan jingshai halor katei ka jingthmu ban buh dukan bam bad hadien ka jingïakren bad utei u heh ophisar, ki dkhot ka seng ki la hiar sha Umling bad pynsangeh noh ïa ka jingtrei, da kaba ong ba ka seng kan ym ailad ïa kano kano ka jingtei lada ym pyndep shwa ïa ka Facilitation Centre.
Haba kren sha ki lad pathai khubor, u Samla Pynkmen Sanmiet u la ong ba ka seng ka la wan ban pan jingshai namar ba naduh u snem 2020 la dep plie ïa ka projek ban tei ïa ka Facilitation Centre ha Umling, ban long ka jaka ban peitngor ïa ka jingwan rung bad jingmih jong ki briew kiba na shabar jylla. Hynrei, katkum ki jingtip ba la ïoh da ka seng, ïa katei ka projek la pynkylla noh ban tei da ka Food Court.
U la ong ba kane kala pynsngewsih ïaka seng namar naduh u snem 2016, hadien ba la mynjur ïa ka Meghalaya Residents Safety and Security Act (MRSSA), ki paidbah ki la khmih lynti ba ka sorkar kan pyntreikam ïa ka aiñ bad pynieng ïa ki Facilitation Centre ha ki bynta bapher bapher jong ka jylla, hynrei haduh mynta, katei ka jngthmu kam urlong.
U Samla Sanmit u la kdew ruh ba u Myntri Rangbah ka jylla u la pynpaw hapoh ka iing dorbar thaw aiñ ba ka sorkar kan wad ki lad ki lynti ban pyllait ïa ka MRSSA na ki jingeh jong ka Judicial Scrutiny bad ban pynurlong ïa ka jingthaw ïa ki Facilitation Centre ha kylleng ka jylla. Hynrei, u la ong ba ka jingpynkylla ïa ka projek ha Umling sha ka Food Court ka long pyrshah ïa ka jingangnud jong ki paidbah kiba kwah ban don ki khyrdop jingïada ban peitngor ïa ka jingwan rung jong ki briew kiba nabar jylla.
U la pynshai ruh ba ka KSU kam pyrshah ïa ka jingtei Food Court ne ïa kino kino ki projek pynroi jong ka sorkar, hynrei, ka seng ka dawa ba dei ban pyndep shwa ïa ka Facilitation Centre kumba la thmu naduh mynshuwa bad u la ong tad haduh ba ka sorkar kan ai ka jingshai bad shim ïa ki sienjam kiba donkam halor kane ka kam, ka seng kan bteng ban pyrshah ïa ka jingtei. U la pyntip ruh ba ha ki sngi ban wan, ka KSU kan sa ïakynduh ïa ki bor ba dei peit jong ka sorkar ban ïakren bad dawa ïa ka jingïaid shaphrang jong ka projek Facilitation Centre ha katei ka jaka.