Bishar ka High Court ïa ka mukotduma PIL halor ka jingduna ki tiar ki tar ha Forensic Lab

Shillong, Jylliew 30 : Ka ïing Bishar High Court jong ka jylla ka la pdiang ïa ka mukotduma PIL bad shong bishar ïa ki jingduna ki jingtei ki tiar jong ka Forensic ha Jylla bad bthah ïa ki bor ba dei khmih ban thaw ïa ki lad ki lynti ban seng ïa ki Forensic Science Laboratories ba treikam laitluid ha Meghalaya.
ïa kane ka hukum la pynmih da ka Division Bench ba kynthup ïa ka Chief Justice Revati Mohite Dere bad Justice W Diengdoh ha ka Lah Sngi U Blei.
ïa kane ka PIL la wanrah hadien ka jingbthah na ka ïing Bishar Supreme Cpourt ha ka hukum ba 11 tarik Jymmang 2026, ha ka mukotduma u Sunny Chauhan pyrshah ïa ka Jylla Haryana.
“Ha kane ka ukotduma Suo Motu PIL, ngi sngewkhia eh bad artylli ki mat kata (i) ka jingbym biang nadong hadong ha ki jingtei bad ki tiar ki tar jong ka Forensic Science Laboratory (FSL) ha Meghalaya bad ka jingaiti ha ka por kaba biang ïa ki kaiphod FSL ha ki case kam bymman bad (ii) ki rukom treikam ba don mynta ban upload bad ïasam ïa ki status report ha ki case kam bymman, kynthup ka jinglah ban shna ïa ka digital police portal ban pynthikna ïa ka jingïoh ha ka por kaba biang ïa ki kaiphod hashuwa ka sngi shong bishar ba la buh” pynpaw ka ïing Bishar.
Ka ïing Bishar ka la bthah ïa ka Registry ban pynngat sa artylli ki liang mamla. “Ngi sngew ba ka dei ban bthah ïa ka Registry ban pynngat liang mamla ia ka Directorate of Central Forensic Science Services, Ministry of Home Affairs, New Delhi bad ka Directorate of Forensic Science Laboratory, Meghalaya kum ki respondent No 3 bad 4” ong ka hukum.
Ka Jylla kala pan por ban ai jubab halor kane. “Ha kajuh ka por, u AAG ula pan por ban file ïa ka affidavit ban jubab. Ka kashari kala ai ïa ka por bad la bthah ban file sha ka Registry hapoh ka lai taiew” ong ka ïing Bishar.
Haba bishar ïa ki jingsngewkhia halor ka jingdon ïa ki jingtei/tiar, ka ïing Bishar ka la ong “ïa mynta, ngi kyntu ïa baroh ki liang mamla ba dang shu pynngat ba kin bishar ïa ka jinglah ban pynkha ïa ki FSL ba treikam laitluid ha Jylla Meghalaya”.
“Haba khmih ïa ki kam kiba don bynta, ngi sngew dei ban thung ïa u K Ch Gautan kum u Amicus Curiae ban ïarap ïa ngi ha kane ka PIL” ong ka ïing Bishar haba bynrap ïa ka Registry ban phah ïa ka petition sha u.
Ka ïing Bishar kala buh ban bishar biang ïa kane ka kam ha ka 27 tarik Naitung, 2026.