Phaikhmat noh sha ka kam jngohkai u dewïong u don la ka por ban lut noh ha EJH : Santa

Shillong, Jylliew 29 : Haba maham pyrshah ïa ka jingshaniah tylli na ka kam tih marpoh khyndew, ka MLA jong ka Sutnga-Saipung ka Kong Santa Mary Shylla ha ka Lah Sngi U Blei ka la ong ba ka East Jaintia Hills kan hap ban pynbun ïa ki lad ki lynti ban kamai naba u dewiong “un nym neh junom”, bad pynbna ïa ki jingthmu ban shna bha ïa ki jaka ba don ki kshaid bad ki krem bym pat don ba poi briew ban kyntiew ïa ki kam jngohkai.
“U dewiong un nym neh junom. Kine ki dei ki marpoh khyndew-Ngim lah ban tip haduh lano kin dang don bad haduh lano kin nym don shuh. Mynta u dei u dewiong, lashai u lah ban dei u mawshun lane kino kino ki marpoh khyndew” ong ka Kong Shylla haba ïakren bad ki nongthoh khubor.
“Nga kyntu ia ki paidbah jong ngi ban phaikhmat sha ki lad kamai shane shatai namar ngim lah ban shaniah beit tang na u dewiong” ka la bynrap. Ka Kong Sylla kala ong ba ki kam jngohkai ka ai ïa ka lad kaba neh ban kamai hapoh ka District.
“Ka kam jngohkai ka dei kawei ka bynta kaba ngi lah ban thaw ïa ki lad kamai na ka bynta ki briew jong ngi. Ki don katto katne ki krem bad ki kshaid ha East Jaintia Hills ki bym pat don ba shem na ka bynta ki kam jngohkai. Nga la dep leit jngoh dalade ha ryngkat ki nongshong shnong” ka la ong.
Ka la pynthikna ba ka la pynkhreh ïa ki jingtyrwa ban shna pynbha ïa ki jaka ba don kine ki jaka jngoh kai ki bym pat don ba poi mano mano ruh.
Hynrei kane ka MLA ka la kyntait ban ïathuh ia kine ki jaka bad ong “Ngam lah ban ai ha phi ïa ki kyrteng jong ki krem namar ki dei ki bym pat pynrung ha ka thup hapoh ki kam jngohkai. Hooid, ki dei kiba don ha East Jaintia Hills”.
Ka kong Shylla ka la kyntu ruh ban pynbha noh mardor ïa ki jaka kiba la pynjulor da ki kam tih dewiong.
“Ngi la tyrwa ïa katto katne ki jaka ban shna pynbha pat ïa ki. Tang mar syn ïoh pyntreikam ïa ki skhim ha kine ki jaka, ki paidbah kin nym don shuh ha ka jingma hadien habud” kala ong.
Halor ki jingtei, kala ong ba ka surok Jowai-Malidor ka la kham bha hynrei ka la maham pat ïa ka jingma ha kane ka aiom slap.
“Nga kyntu ïa ki paidbah ba kin phikir bha ha kum kane ka por, khamtam ban leit jingleit ha ka por mynmiet haba ther u slap” kala bynrap.