Lada pynhiar sha ka 5-10 hectare, khambun ki nongtrei dewïong ki ban myntoilang : Kong Santa Mary

Shillong, Jylliew 29: Ka MLA ka Sutnga-Saipung, Kong Santa Mary Shylla, ka la ong ba ka Sorkar Meghalaya ka dang ïa kren haduh mynta bad ka Sorkar Pdeng na ka bynta ban pyntreikam ïa ka rukom tih dewiong katkum ka juk stad mynta da kaba pynhiar noh ïa ka jingdonkam jaka sha ka 5-10 hectare na ka 100 hectare kaba buh mynshwa khnang ba baroh ki nongtrei dewiong kiba rit kin ïoh lang ïa ka jingmyntoi.
Haba kren sha ki lad pathai khubor, ka Kong Santa Mary ka la ïathuh ba dang shen ka la don ka jingïalang ba la khlieh da u Myntri Rangbah ka Jylla, u Conrad K. Sangma, ryngkat bad ki nongtih bad nongkhaiï dewiong ban ïakren ïa ki lad ki lynti ban pynurlong ïa ka Scientific Mining.
Ka la ïathuh ba la dep ruh ban aiti ïa ka dorkhas bad ki jingai jingmut sha ka Sorkar Jylla, bad u Myntri Rangbah ryngkat bad ki ophisar ki la shimkhia ïa kine ki jingtyrwa.
Katkum ka jingïathuh jong ka Kong Santa Mary, ka jingthmu ka long ban wanrah ïa ka rukom tih dewiong kaba thymmai kaba ïada ïa ka mei mariang hynrei kaba ailad ruh ïa ki trai par dewiong ban bteng ïa ka kam.
“Ka jingpynduna ïa ka jingdonkam jaka sha ka 5-10 hectare kan long kaba kham suk ïa ki nongtih dewiong barit ban ïoh ïa ka jingbit ban treikam,” ka la bynrap biang.
Ka Kong Santa Mary ka la ong ba baroh ki kot ki sla kiba donkam la dep pynkhreh bad la dep ban aiti sha ka Sorkar, bad ka pynpaw ka jingshaniah ba u Myntri Rangbah un nang bteng ban buddien ïa kane ka mat bad ka Sorkar Pdeng khnang ba ki paidbah ka East Jaiñtia Hills kin ïoh biang ïa ka kamai kajih.