Kyntait ka sorkar ban ai ram khlem sut haduh 200 klur tyngka ïa ka USTM na bynta ka Medical College

Shillong, Jylliew 29 : U Myntri ka Koit ka Khiah u Ma Wailadmiki Shylla ha ka Lah Sngi U Blei ula ïathuh ba ka Sorkar Jylla ka la kyntait ïa ka jingpan ram ba khlem sut ka University of Science Technology Meghalaya (USTM), ka ba kot 200 klur tygnka na ka bynta ban tei ïa ka PA Sangma International Medical College & Hospital (PIMC).
“Haba sdang ka la don ka jingïakren, hynrei hadien ka Sorkar ka la kyntait ïa kane ka kam. Kam don satia kano kano ka jingkyrshan ban ai ia kane ka ram ba la pan” ong u Ma Wailad haba ïakren bad ki nongthoh khubor kiba kylli shaphang kane ka jingkyrpad ka USTM.
Ula pynshai ba ïa kane ka rai la shim da ka jingïalang ba hashuwa jong ka Kynhun Myntri. “Ha ka jingïalang ba hashuwa jong ka Kynhun Myntri, Ngam pat don hapoh ka kynhun myntri. Hynrei ka rai ba la shim ka long ban kyntait ïa ka jingkyrpad ban ai ram ba khlem sut sha ka USTM” ula ong.
Namar ka jingbym tip ïa kiei kiba la ïakren ha ka jingïalang, u Bah Wailad ula kdew ïa ka jingduna pisa lehse ka lah ban dei ka daw.
“Ngam pat don bynta ha ka Kynhun Myntri ha katei ka por, kumta ngam da tip bha ïa kaei kaba ïakren. Hynrei ka lah ban dei kaba shonghok ka jingshim rai. Ka Meghalaya kam dei ka Jylla kaba tam ka jingpynmih pisa, ngi dei kaba duna ka jingpynmih pisa” ula ong.
“Ngi don ruh ïa bun kiwei ki kam ba kongsan ba hap ban pynleit jingmut bad ban kynshew. Naba ka USTM ka dei ka jaka pule shimet, ka Sorkar ha katei ka por lehse ka lah ban sngew ba ka lah ban pynïoh ïa ka pisa lane kyrshan pisa na kiwei ki thymmei. Nga tharai ka dei kata ka daw ba ka Sorkar kala shim ïa ka rai” ula bynrap.