Shillong, Jylliew 27: U Hasebinson Marwein bad ka Marqueenless Ramsiej ki la jop ha ka jingïakop mareh jong ki shynrang bad kynthei ha ka sienjam kaba hynñiew (7th) jong ka Shillong 10K Run 2026, ba la pynlong da ka Meghalaya State Olympic Association (MSOA) ha ka step sngi Saitjaiñ.
ïa kane ka jingïakop mareh kaba man la u snem la pynlong ha ka sngi Saitjaiñ kaba jan bad ka 23 tarik u Jylliew, kaba la rakhe kum ka ‘International Olympic Day’ ban kynmaw ïa ka jingseng ïa ka ‘International Olympic Committee’ ha u snem 1894. Ha kum kane ka sngi la ju pynlong ïa ka jingïakop mareh kaba jngai 10 kilomitar ha kylleng ka pyrthei bad ka Shillong ka la ju sakhi da ki spah ngut ki nongmareh naduh ki samla haduh ki tymmen kiba ïashim bynta man la u snem.
Ïa kane ka jingïakop mareh la lah ban pynurlong lyngba ka jingïarap jong ka Directorate of Sports and Youth Affairs, ki bor pynïaid district jong ka East Khasi Hills, ka tnad Pulit bad da ki phew ngut ki nongtrei mon sngewbha.
U Hasebinson u la lamkhmat ïa ka jingïakop mareh ha ka liang ki shynrang ban pyndep nyngkong eh, bad ha ka kyrdan ba-ar la wan bud da u nongjop jong u snem 2024 u Wanbok L Mawphlang, nangta u Junom Phawa u la pyndep ha ka kyrdan ba lai.
Ha ka liang jong ki kynthei ïa ka namjop la khur da ka Marqueenless, kaba la wanphai biang sha ka kyrdan ba ha khlieh duh hadien ba ka la jop khatduh ïa kane ka jingïakop mareh ha u snem 2024. Kawei na ki nongmareh marathon ba pawnam jong ka Meghalaya, ka la pyndep ruh ha ka kyrdan kaba lai arsien – ha u snem 2022 bad 2023. Ha ka kyrdan ba-ar mynta u snem ka dei ka Jidalin Tympuin, katba ka Maryqueen Pale ka la bud ha ka kyrdan ba lai.
Kum ki lahduh, baroh arngut ki nongjop (shynrang bad kynthei) ki la ïoh mar 5 hajar tyngka kum ka khusnam pisa, nangta 3 hajar tyngka ïa ki arngut (shynrang bad kynthei) kiba wan ba-ar bad 2 hajar tyngka ïa kiba pyndep ha ka kyrdan ba lai.
Nalor ki nongjop ka la don ruh ka jingsam ïa ki consolation prize na ka bynta kito kiba la pyndep hapdeng ka kyrdan kaba saw haduh kaba phra, nalor kata, ka MSOA ka la sam ruh ïa ki jingai sngewbha ïa baroh ki nongmareh kiba la palat ïa ka 55 snem.
La kaweh lama ban sdang ïa ka jingmareh da u nongïakop mareh thong ba pawnam jong ka ri India u Binningstar Lyngkhoi bad u Damang Syngkon u nongïalehkai karate uba la jop takma ha ki rynsan ïakop bar ri (International) u dei ruh u District Sports Officer ba thymmai jong ka East Khasi Hills.
Ha kane ka sngi la ïa donlang ruh u Working President ka MSOA – bah John F Kharshiing bad u General Secretary-bah Finely L Pariat. Baroh arngut ki la pynshlur ïa ki nongmareh ba kin pyrkhat ban rung sha ka Sohra International Half Marathon 2026 (ka ban don ruh ïa ki jingïakop mareh kaba 10km bad 5km) ha ka 04 tarik Nailur. Ka jingpynrung kyrteng na ka bynta katei ka jingïakop mareh kan plie ha ka 01 tarik u Naitung, bad yn pdiang tang 11,000 ngut ki nongïashim bynta.
