25 tarik Naitung yn sdang ka Durand Cup; ïoh biang ka nongbah Shillong ban pynlong ïa ki jingïalehkai

Shillong, Jylliew 25: Kawei na ki lympung phutbol ba la rim tam ha ka pyrthei kan khreh ban wanphai biang ha kaba ka IndianOil Durand Cup 2026 kan sdang naduh ka 25 tarik u Naitung haduh ka 23 tarik u Nailar.
Ha ka sienjam kaba 135 ka Durand Cup ka dang bteng ban pynneh ïa ka riti dustur kaba riewspah kum ka lympung phutbol kaba rim tam ha Asia bad ka lympung phutbol kaba lai kaba la rim bad kaba dang neh dang sah ha ka pyrthei.
Mynta u snem kane ka lympung kan don 24 tylli ki kynhun, kynthup ïa ar tylli ki klob bar ri, ki ban ïakhun ha kylleng ki san tylli ki nongbah ba pdiang ban pynlong ïa ki jingïakhun kaba shibnai ban ïaknieh ïa kawei na ki khusnam ba pawnam tam jong ka phutbol India.
Ka NorthEast United FC kan wanphai biang ban ïada ïa ka nam lahduh kaba ka la ïohrah ha ka samoi ba la dep pyrshah ïa ki katto katne ki klob bad ki kynhun phutbol ka tnad Shipai kiba khlaiñbor jong ka ri.
Ka nongbah Shillong jong ka jylla Meghalaya ka la wanphai biang kum kawei na ki jaka ban pynlong ïa ki jingïalehkai mynta u snem ryngkat ka Kolkata, Guwahati, Imphal bad ka Ranchi – kaba la shah jied ha ka sien ba nyngkong ha ka histori jong kane ka lympung ban pynlong ïa ki jingïalehkai.
Ki jingïakhun kin long ha ki hynriew tylli ki madan: kata ka Vivekananda Yuba Bharati Krirangan bad Kishore Bharati Krirangan ha Kolkata, Birsa Munda Stadium ha Ranchi, Indira Gandhi Athletic Stadium ha Guwahati, Khuman Lampak Stadium ha Imphal, bad ka Jawaharlal Nehru Stadium ha Shillong.
ïa ki jingtip ba bñiah ha kaba ïadei bad ki klob kiba ïashim bynta, ka jingpynïakap kynhun ha la ki jong ki Group, ka prokram ïalehkai yn sa pynbna hadien.