Mynta ka sngi yn plie ka Sorkar Jylla ïa ka “CM Football Fan-Park” ban pyni Live ïa ki jingïalehkai FIFA World Cup 2026
Shillong, Jylliew 25: Ka thaiñ Polo ha Shillong kan kylla long ka pdeng jong ki paidbah ba ieit phutbol naduh ka sngi Thohdieng, hadien ba ka Sorkar Meghalaya kan plie ïa ka “Chief Minister’s Football Fan-Park” ban pyni paidbah live ïa ki jingïalehkai jong ka FIFA World Cup 2026.
Ïa kane ka Fan-Park la pynkhreh ha ka S.R.G.T Parking Lot, bad yn plie paidbah ïa ka ha ka 26 tarik Jylliew. Ka jingrung kan long ei paidbah, bad ka sorkar ka la ong ba ka jingthmu jong kane ka sienjam ka long ban wallam lang ïa ki nongieit phutbol ha kawei ka jaka ban ïoh mad ïa ka jingïakynduh lang kaba kum ka jinglong ha ki stadium.
Ban ïahap bad ka por ha ka jylla, tang ïa ki jingïalehkai kiba sdang ha ka por 9:30 mynmiet, 10:30 mynmiet bad 12:30 shiteng synñia yn pyni paidbah lyngba ka giant screen.
Nalor ka phutbol, ka Fan-Park kan sa long ruh ka rynsan jingïalang jong ka put ka tem. Ha man ki sngi jingïalehkai, yn don ki jingrwai bad jingpynbyrngia da ki nongrwai kiba hap hapoh ka Chief Minister’s Meghalaya Grassroots Music Program (CM-MGMP), kaba pynlong ïa kane ka jaka kum ka jingïasoh hapdeng ka jingïalehkai bad ka kolshor.
Ki ophisar ki la ong ba kane ka jingthmu ka dei shi bynta jong ka jingïaid lynti kaba kham heh jong ka sorkar ban thaw ïa ki jaka paidbah kiba pynïasoh ïa ki samla bad ki paidbah lyngba ka jingïalehkai sports bad ka sap jingïarwai.
“Ka pynpaw ïa ka jingangnud jong ngi ban thaw ïa ki jaka paidbah kiba im bad kiba pynkupbor ïa ka phutbol, ka put ka tem bad ka jingïatylli,” la ong ka Tnad Tourism ha ka kyrwoh.
Ka Fan-Park ka ïahap ruh bad ka thong jong ka sorkar ban tei ïa ka stadium phutbol kaba heh tam ha India ha Mawkhnau, kaba long shi bynta jong ka jingthmu ban kyntiew ïa ka Meghalaya kum ka jylla phutbol.
Da kaba pynkylla ïa ka jaka pynieng kali paidbah sha ka jaka peit World Cup, ka sorkar ka kyrmen ban nang pynshlur ïa ka jingieit phutbol ha ka jylla bad ban ai lad ïa ki paidbah bad ki nongwan jngohkai ban peit lang ïa ka lympung phutbol ba heh tam ha pyrthei khlem da donkam ban thied tiket.
La khot sngewbha ïa baroh ki nongieit phutbol ban wan sha ka Fan-Park naduh ka 26 tarik Jylliew bad ban shim bynta ha ka jingïakmen World Cup kaba la pynkhreh da ka sorkar jylla.