Ngi donkam ka jingïatreilang ban rat dyngkhong ïa u drok: Bah B. Jyrwa, MPS

Mawkyrwat, Jylliew 21: Ka Office jong u Superintendent jong ki Pulit ka South West Khasi Hills District, ha ka sngi saitjaiñ jong ka taïew ka 20 tarik u Jylliew, 2026 ka la pynlong ïa ka Awareness – cum – Interaction Programme ryngkat ki Drug Recovering Dependents halor ka phang, “Together Towards Recovery, Dignity, and Drug Free Society” ba la pynlong ha Mawkyrwat Community Hall, South West Khasi Hills District.
Ha kajuh hi ka sngi ki la rakhe ruh ïa ka Nasha Mukt Bharat Saptah ne ka sngi ban ïaleh pyrshah ïa u drok bad ki jingkhaïi be-aiñ kaba dei halor ka phang, “Nasha Mukt Bharat Ahiyan – Viksit Bharat Ki Pehchaan” kaba dei ka jingrakhe kaba la sdang naduh ka 17 tarik u Jylliew, 2026 haduh ka 26 tarik u Jylliew, 2026.
Ka jingthmu ba kongsan jong kane ka program ka long ban pynsngewthuh ïa paidbah, khamtam ïa ki samla, shaphang ki jingma bad jingktah kiba mih na ka jingdih bad jingpyndonkam drug, bad ruh ka jingdonkam ban don ka jingïatreilang ban ïakhun pyrshah ïa ka jingkhaïi drug bad kaba kham kongsan ka dei ka program ai mynsiem ïa kito ki samla kiba la ngop ha u drom bad kiba la ki kwah ban lait noh syndon namar da ka jingkut jingmut jong ki ki lah ban lait na ka jingshah teh mraw ha u drok.
Lah ban kdew ba ïa kane ka program la pynlong da ka jingïatreilang ka ophis jong ka Deputy Commissioner, South West Khasi Hills District, ka Joint Action Committee on Anti Social Elements (JACASE), lem bad ki tnad treikam jong ka sorkar.
U bah B. Jyrwa, MPS, Superintendent jong ki Pulit ka South West Khasi Hills District haba kren ha ka jingïalang u la pynpaw ba naduh ba u la sdang ïa ka jingtreikam hapoh kane ka South West Khasi Hills District u la don lypa ïa ka jingthmu ba kane ka thma ban pynduh jait ïa u drok ka dei ban ïai bteng haduh ban da lah ban rad-dyngkhong syndon namar lah ban ong ba kam pat da kynrei ne jyllei kumba long ha kiwei ki distrik hapoh jong ka Jylla Meghalaya.
“Mynta ngi buh ruh ïa ka thong ba hapoh ki 2 ne 3 snem, lyngba ka jingïatreilang jong baroh ki paidbah nongshong shnong hapoh jong ka South West Khasi Hills District ba ka jingdon jong ki nongdih drok kan duna ne kan duh jait syndon ne Zero Drugs”, ong u SP.
Ym tangkata, u la ïathuh ruh haduh mynta ki nongdih drok hapoh ka South West Khasi Hills District ki la poi mynta pat ïa ka 100 ngut ei ei, hynrei napdeng kine, ki la don mynta ha ka lynti ban pynbha ne kylla ïa ka jingim sha ka lynti ba bha. Namarkata, u la buh ka jingkyrpad ïa ki paidbah nongshong shnong baroh ba kin ai lem ka kti ka mon ka kti ka diang ban long kiba ïatreilang ban rad-dyngkhong syndon namar lada ymdon ka jingïatreilang da lei lei ym nym lah ban pynduh jait.
Haba kren ai mynsiem na ka bynta ki samla kiba la don shisha ka jingthmu ban kylla noh na ka jingkyrni ïa u drok sha ka jingim ba bha, u bah B. Jyrwa, MPS u la ai jingmut ïa ki ba kin sdang ban wad ki lad ki lynti lyngba ka jingïashimbynta ha ki kam ba ka sorkar ka ai kum ki jingshah hikai pyntbit kiba don hapoh jong ka Skill Development namar ha kane ki don shibun ki jait jinghikai na ka bynta ki khun samla bad lyngba kane ruh kiba kum kine ki samla kin lah ban pynbha ïa ka lynti ïaid jong ki da kaba kin sa long ruh ka nuksa ba bha ïa kiwei de kiba la kyrni ha u drok ba kin kylla noh ne ïaid noh ha ka lynti jong ka jingim ba thymmai.
Ka kong A.L. Mawlong, IAS, Deputy Commissioner ka South West Khasi Hills District ha ka jingkren jong ka la ïathuh ïa ki jingktah bad ki jingma lada u ne ka briew ki dih ïa u drok ha kaba ka ktah ym tang ïa nongdih shimet hynrei ïa ka ïing ka sem, ka shnong ka thaw bad ka ri ka jaidbynriew ruh. “Lada ki nongdih drok kim lah ban tehlakam ki lah ruh ban poi wat ha u pud ban shim ïa ka jingim namar kum kine ki jingdih ki ktah ruh wat ïa ka por pyrkhat ruh”, ong ka kong A.L. Mawlong, IAS.
Kumta, ban lait na une u dih uba pynjot ïa ka jingim briew, ka la ai jingmut ba kum ki samla ki kim dei ban pynmlien ha ki kam kiba sniew hynrei ban pynmlien ïa lade ha ki kam kiba lah ban tei ïa ka jingim kum ha ki kam ïalehkai sports bad kiwei de. Shuh shuh ka la ong ruh ba lada ki samla kiba la ngop ha une u drok ki kwah shisha ban lait bad im noh ka jingim ba bha, ki dei ban don ha ki ïa ka mynsiem jong ka jingkut jingmut, don ha lade ïa kata ka mon bajwat, ka rai skhem ha ryngkat ka jingduwai khnang ba kin lah ban poi sha ka thong jong ka jingjop ha ryngkat ka jingkyrshan lang jong ka imlang ka sahlang.
Kiwei de ki nongkren ha kane ka sngi ki long u bah E. Tariang, District Social Welfare Officer (DSWO), South West Khasi Hills District, u Dr. F.R. Lartang, District Medical and Health Officer (DM&HO), South West Khasi Hills District, ka kong B. Majaw, Chief Judicial Magistrate, Mawkyrwat District Court bad na u Pastor P. Wanniang uba la ai ruh ka jingkren lyngkot ryngkat ka jingduwai.
Ha kane ka sngi la pynlong ruh ïa ka jingaisyrnod ïa ki katto katne ngut ki samla kiba la don shisha ïa ka mynsiem jong ka jingthrang ban kylla ha ka jingim jong ki ban lait na u drok, nangta bud sa ka jingïakren bad jingïatai paidbah ne interaction ha kaba ki nongshimbynta ki la ïoh lad ban ïakren bad ki nongkren halor ki bynta bapher bapher kiba ïa dei bad ki lad jingïada bad kumno ban ki khun ki kti kin lait na ka jingdih drok.
Ïa ka jingïalang la pynïaid da u bah W.C. Deleo Toi, ka jingkren pdiang sngewbha la ai da u bah B. Kharjana, MPS, Additional Superintendent jong ki Pulit ka South West Khasi Hills District, bad ka jingkren khubei na u bah J. Lakiang, Officer-in-Charge, Mawkyrwat Police Station.