Wanpoi u Rajnath Singh ha kad liengsuiñ Umroi, pdiang burom ki Sahep ka jylla bad ki nongïalam BJP

Nongpoh, Jylliew 20: U Myntri ka tnad ïada ri, u Rajnath Singh mynta ka sngi u la wan poi ha kad liengsuiñ ha Umroi bad ïa utei u myntri la pdiang burom mynta ka sngi da ki heh ophisar ka jylla naduh u Bah FR Kharkongor Principal Secretary, u Abhishek Saini Deputy Commissioner ka Ri-Bhoi, u Giri Prasad Superintendent of Police ka Ri-Bhoi bad kiwei kiwei.
Ha kane ka sngi la don ryngkat bad pdiang burom ruh da ki heh BJP ka jylla naduh u Bah AL Hek MLA ka Pynthor Umkhrah, u Bah M Kharkrang nongai ktien ka BJP ha ka jylla bad kiwei kiwei. Na ka liang u Rajnath Singh u la wan poi ha kad liengsuiñ Umroi da ka liengsuiñ hapdeng ka jingpahara kaba jur bad nangtei u la shong pat da ka Helicopter ban kiew sha nongbah Shillong ban leit shim bynta ha ki prokram bapher bapher haka sngi u Blei.