Tang hapoh 1 bnai kynriah tarik ka tnat pule ïa ka subjek Social Science ki khynnah skul: HYC

Shillong, Jylliew 20: Ka Seng Hynñiewtrep Sengkmie lyngba ka Education Cell ka la pynpaw ka jingsngewkhia halor ka jingpynmih jingpynbna ba kyrkieh jong ka tnat Pule Puthi jong ka sorkar jylla ha kaba ïadei bad ka jingpynkylla ïa ka tarik ban pynlong ha ka eksam shiteng snem jong ka subjek Social Science kaba dei jong ki khynnah skul ba dang leit klas VI haduh VIII kaba dei ban long ha ka 23 tarik mynta u bnai.
Haba kren sha ki lad pathai khubor na ka liang u Samla Enlang Sawian Education Secretary ka HYC u la ong ba kane ka jingleh jong ka sorkar ka long kaba la leh khlem pyrkhat naba kane ka la buh jingeh ïa ki khynnah skul bad kumjuh ruh ïa ki nonghikai bad kane ka la wanrah ruh ka jingkulmar ïa ki kmie ki kpa kiba la phone sha ki nongïalam ka seng ha ka miet jong ka sngi Thohdieng ban pynpaw ïa ka jingeh halor kane ka jingleh ka sorkar bad ka seng naduh ka 8 baje haduh ka 11 baje mynmiet ka la hap ban sngew ban sngap ïa ka jingeh ba la pynpaw da ki kmie ki kpa halor kane ka jingleh ka sorkar lyngba ka tnat ka pule puthi.
“Ka jingpynbna ba la pynmih da ka Directorate of School Education and Literacy lyngba ka shithi ba la phah da u Director of School Education and Literacy, Meghalaya Shillong u Bah J Kharshandi, MCS u la ïathuh ba ka subjek Social Science kaba la buh ban pynlong ha ka 23.06.26 ha ka sngi baar u taïew ban wan na ka bynta ki khynnah klas VI haduh VIII kaba la pynmih lyngba ka jingpynbna ha ka 20.05.26 la pynbeit thymmai biang ha kaba ïadei bad ka eksam shiteng snem bad ïa kane ka eksam jong kane ka subjek la buh ban pynlong noh ha ka 30.06.26 na ki daw jong ki rukom treikam, kumta kane ka long kaba ym lah satia ban pdiang bad tang na kane ka daw ka la pynlong ïa ka seng ba ka hap ban shimkhia ïa kane ka kam ha ka por shiteng miet ban ïakren ïa kane ka jingeh,” ong u Education Secretary ka HYC.
U la ong ruh ba ka sorkar na ka por sha ka por ka ju leh kum kine ki kam kiba ktah bha ïa ka pule puthi bad kumjuh ruh haba ka leh ne pynkylla ïa kino kino ki bynta jong ka pule puthi ki la dei ban khot lang ïa ki nonghikai ban ïa ai jingmut, hynrei ïa kane ruh kim leh hynrei ki la khot pynban ïa ki heh khlieh ban ai jingmut ha ki jingïalang ha ka jaka ban khot ïa ki nonghikai.
Haba ïadei bad ka jingbuh kyrdan jong ka Niti Ayog ïa ka pule puthi jong ka jylla Meghalaya ha ka ri baroh kawei, u Samla Enlang u la ong ba kane ka jingleh jong ka sorkar jylla lyngba ka tnat pule puthi haba ïadei bad kane ka jingpynbna ba kynriah tarik kan long ruh kawei na ki nuksa barit ba pynlong ïa ka jylla ba kan hiar sha ka kyrdan kaba hiar duh halor ka pule puthi.
Kumta ka HYC ka la kyrpad ïa ka sorkar ba haba ka leh ïa kano kano ka kam kaba ïadei bad ka jingktah ha ka pule puthi kadei ruh ban khot ïakren lang ïa ki nonghikai naba dei maki kiba don baroh shisngi bad ki khynnah skul bad dei maki ruh kiba tip bha ïa ki subjek bad kiwei pat ki kam jong ki skul.